قىرعىزستان پرەزيدەنتى سادىر جاپاروۆ ەلدەگى جاعدايدى تۇراقسىزداندىرۋعا ارەكەت ەتەتىن جانە سىرتقى كۇشتەردەن قارجى الاتىن ادامداردى قاتاڭ جازالاۋدى تاپسىردى، دەپ حابارلايدى "ادىرنا" ءتىلشىسى.
بۇل تۋرالى ول 29 تامىزدا بىشكەكتە شانحاي ىنتىماقتاستىق ۇيىمى ءسامميتى مەن VI دۇنيەجۇزىلىك كوشپەندىلەر ويىندارىنىڭ قاۋىپسىزدىگىن قامتاماسىز ەتەتىن كۇشتىك قۇرىلىمداردىڭ گارنيزوندىق ساپقا تۇرۋ راسىمىندە ايتتى. جاپاروۆتىڭ سوزىنشە، ەل ىشىندە سىرتقى كۇشتەردىڭ ىقپالىنا ءتۇسىپ، حالىق اراسىندا دۇربەلەڭ تۋعىزۋعا تىرىساتىن ادامدار بار. پرەزيدەنت مۇنداي ارەكەتتەرگە جول بەرمەۋ كەرەگىن ايتىپ، كۇشتىك قۇرىلىمداردان جوعارى كاسىبيلىك پەن جاۋاپكەرشىلىكتى تالاپ ەتتى. ونىڭ سوزىنشە، قىرعىزستاننىڭ دامۋىنىڭ باستى شارتتارىنىڭ ءبىرى – قاتاڭ ءتارتىپ. سونداي-اق مەملەكەت باسشىسى قۇقىق قورعاۋ ورگاندارىنىڭ ماتەريالدىق-تەحنيكالىق بازاسىن نىعايتۋ، قىزمەتكەرلەردىڭ جالاقىسىن ارتتىرۋ، الەۋمەتتىك قولداۋدى كەڭەيتۋ جانە تسيفرلىق تەحنولوگيالاردى ەنگىزۋ ماسەلەلەرىنە توقتالدى.
ايتا كەتەيىك، قىرعىزستاندا شىۇ ءسامميتى مەن VI دۇنيەجۇزىلىك كوشپەندىلەر ويىندارى قارساڭىندا قاۋىپسىزدىك شارالارى كۇشەيتىلدى. شىۇ ءسامميتى بىشكەكتە 30 تامىز بەن 1 قىركۇيەك ارالىعىندا وتەدى دەپ جوسپارلانعان. ال كوشپەندىلەر ويىندارى 31 تامىزدان 6 قىركۇيەككە دەيىن ۇيىمداستىرىلادى. وعان 100-دەن استام ەلدەن شامامەن 3 مىڭ سپورتشى قاتىسادى.
