بەسپاەۆ نەگە ساعىنتاەۆتىڭ كەڭەسشىسى بولدى؟

835

مەيرامبەكتىڭ الماتى قالاسى اكىمىنىڭ شتاتتان تىس كەڭەسشىسى بولىپ تاعايىندالۋىن اركىم ارقالاي قابىلداپتى. ينستاگرامدا قۇتتىقتاۋ باسىمىراق بولسا، فەيسبۋكتا "مۇنى قالاي تۇسىنەمىز؟" سىڭايىنداعى سىن-پىكىرلەر دە ايتىلىپ جاتىر.

مەنىڭشە، اكىم انشىدەن قالانىڭ ساياسي-ەكونوميكالىق، قوعامدىق-الەۋمەتتىك شارۋاشىلىعىنا قاتىستى كەڭەس سۇرايىن دەپ وتىرعان جوق. مەيرامبەكتىڭ سالاسى - مادەنيەت، ونەر. ول بۇل سالانىڭ ىشكى-سىرتقى ءمۇڭ-مۇقتاجىن، بۇكىل پروبلەماسىن وتە جاقسى بىلەدى. ءوزى قازاقى جىگىت، ۇلتتىق ۇستانىمى ايقىن، ءار نارسەگە وزىندىك كوزقاراسى بار ازامات. ارزان شوۋدىڭ سوڭىندا جۇرگەن كوپ ءانشىنىڭ ءبىرى ەمەس. كەيىنگى جىلدارى قازاقتىڭ ۇلتتىق ونەرىنەن گورى، شوۋقۇمار شوشاقايلاردىڭ "ەكى جەپ، بيگە شىعىپ" كەتكەنى ونىڭ دا جانىن اۋىرتپاس، كوكەيىن تەسپەس دەپ ويلامايمىن. ساعىنتاەۆ اقىرى اقىلداسادى ەكەن، ونەر مەن مادەنيەتتىڭ ماسەلەسىن وعان مەيرامبەكتەي جەتكىزىپ ايتىپ، نىقتاپ كورسەتە الاتىن ادام كەمدە-كەم شىعار.

مادەنيەتىمىزدى "رەپەتيتسيانى ترەنيروۆكامەن شاتاستىراتىن" اشلياەۆ تا باسقارعانىن ۇمىتىپ ۇلگەرگەن بولارمىز، بىراق سويلەگەن سايىن اۋزىنان "افوريزم" توگىلەتىن ارىستانبەك-شەشەننىڭ دە التى جىل وتىرىپ، كەشە ارەڭ كەتكەنى ەسىمىزدە عوي! سولارعا دا ءتوزىپ كەلىپ، ەندى مەيرامبەكتىڭ كىشكەنە عانا قىزمەتىن كورە قالعانىمىز با؟ ول - ونەردىڭ ءوز ورتاسىنان سۋىرىلىپ شىققان تالانت قوي، قولىنان كەلگەنىنشە ارەكەت ەتسىن. ونىڭ ۇستىنە رەسپۋبليكا ەمەس، قالا اكىمىنىڭ شتاتتان تىس كەڭەسشىسى عانا. مەيرامبەك ماقۇل دەمەگەندە، وسى ۇسىنىس ءبارىبىر بىرەۋگە جاسالار ەدى عوي. ءوز باسىم ء"بارىبىر بىرەۋدەن" گورى مەيرامبەكتىڭ بارعانىن ءجون سانادىم. جۇمىسىنا ساتتىلىك تىلەيمىن!

 

ساكەن سىبانباي
"ادىرنا" ۇلتتىق پورتالى

پىكىرلەر