Bespaev nege Saǵyntaevtyń keńesshisi boldy?

836

Meırambektiń Almaty qalasy ákiminiń shtattan tys keńesshisi bolyp taǵaıyndalýyn árkim árqalaı qabyldapty. Instagramda quttyqtaý basymyraq bolsa, feısbýkta "Muny qalaı túsinemiz?" syńaıyndaǵy syn-pikirler de aıtylyp jatyr.

Menińshe, ákim ánshiden qalanyń saıası-ekonomıkalyq, qoǵamdyq-áleýmettik sharýashylyǵyna qatysty keńes suraıyn dep otyrǵan joq. Meırambektiń salasy - mádenıet, óner. Ol bul salanyń ishki-syrtqy múń-muqtajyn, búkil problemasyn óte jaqsy biledi. Ózi qazaqy jigit, ulttyq ustanymy aıqyn, ár nársege ózindik kózqarasy bar azamat. Arzan shoýdyń sońynda júrgen kóp ánshiniń biri emes. Keıingi jyldary qazaqtyń ulttyq ónerinen góri, shoýqumar shoshaqaılardyń "eki jep, bıge shyǵyp" ketkeni onyń da janyn aýyrtpas, kókeıin tespes dep oılamaımyn. Saǵyntaev aqyry aqyldasady eken, óner men mádenıettiń máselesin oǵan Meırambekteı jetkizip aıtyp, nyqtap kórsete alatyn adam kemde-kem shyǵar.

Mádenıetimizdi "repetıııany trenırovkamen shatastyratyn" Áshlıaev ta basqarǵanyn umytyp úlgergen bolarmyz, biraq sóılegen saıyn aýzynan "aforızm" tógiletin Arystanbek-sheshenniń de alty jyl otyryp, keshe áreń ketkeni esimizde ǵoı! Solarǵa da tózip kelip, endi Meırambektiń kishkene ǵana qyzmetin kóre qalǵanymyz ba? Ol - ónerdiń óz ortasynan sýyrylyp shyqqan talant qoı, qolynan kelgeninshe áreket etsin. Onyń ústine respýblıka emes, qala ákiminiń shtattan tys keńesshisi ǵana. Meırambek maqul demegende, osy usynys báribir bireýge jasalar edi ǵoı. Óz basym "báribir bireýden" góri Meırambektiń barǵanyn jón sanadym. Jumysyna sáttilik tileımin!

 

Sáken SYBANBAI
"Adyrna" ulttyq portaly

Pikirler