FlyArystan اۋە كومپانياسىنىڭ ۇشاعى اقتاۋعا ەكى رەت قونا المادى، دەپ حابارلايدى «ادىرنا» ۇلتتىق پورتالى.
«كس7277 رەيسى اتىراۋ – اقتاۋ باعىتىندا 2 قاراشا كۇنى ساعات 06.40-تا ۇشىپ شىعۋى ءتيىس بولاتىن. الايدا، اۋە كومپانياسى اقتاۋ قالاسىنداعى اۋا رايىنىڭ قولايسىزدىعىنا بايلانىستى رەيستى كەيىنگە قالدىرۋعا ءماجبۇر بولدى»، - دەپ مالىمدەدى FlyArystan ءباسپاسوز قىزمەتى.
2 قاراشا كۇنى ساعات 21.50-دە ۇشاق قويۋ تۇمان سالدارىنان اقتاۋعا قونا الماي، كەرى قايتقان. كەلەسى كۇنى تاڭعى ساعات 7-دە ۇشاق قايتادان قونا المادى.
رەيستىڭ قايتادان ۇشۋ ۋاقىتى 3 قاراشا 17:30-عا جوسپارلانعان.
جەرگىلىكتى «اق جايىق» باسىلىمىنىڭ حابارلاۋىنشا، جولاۋشىلار ۇشاق كۇتۋ كەزىندە ىستىق تاماق پەن باسقا دا قولايلى جاعدايلاردىڭ جوقتىعىنا نارازى بولعان.
«كىدىرىس كەزىندە جولاۋشىلارعا سۋ جانە ىستىق تاماق، سونداي-اق ءوتىنىش بويىنشا قوناقۇيدە تۇرۋ جانە تۇرعىن ءۇي قۇنىن وتەۋگە كەپىلدىك حاتتار بەرىلدى»، - دەپ جاۋاپ بەردى FlyArystan قىزمەتى.
