بۇگىن، 13 شىلدەدە ازەربايجان پرەزيدەنتى يلحام اليەۆ تۇركيا مەن ازەربايجاننىڭ ءبىر-بىرىنە ەڭ جاقىن مەملەكەتتەر ەكەنىن ايتتى، دەپ حابارلايدى «ادىرنا» ءتىلشىسى اپا-عا سىلتەمە جاساپ.
«ساياسي، ەكونوميكالىق، ەنەرگەتيكالىق جانە كولىك بايلانىستارىنىڭ دەڭگەيىنە، سونداي-اق حالىقتار اراسىنداعى قارىم-قاتىناسقا نازار اۋدارساق، الەمدە تۇركيا مەن ازەربايجانداي ءبىر-بىرىنە سونشالىق جاقىن، ءوزارا قولداۋ كورسەتەتىن ءارى دوستىق بايلانىسى بەرىك ەكى ەلدى تابۋ قيىن شىعار»، – دەدى مەملەكەت باسشىسى IV شۋشا جاھاندىق مەديافورۋمىنىڭ اشىلۋىندا.
پرەزيدەنت ەكى ەل اراسىنداعى قارىم-قاتىناس ازەربايجان جانە تۇرىك حالىقتارى ءۇشىن باعا جەتپەس قۇندىلىق ەكەنىن اتاپ ءوتتى.
ء«بىز بىرگە كۇشتىرەكپىز»، – دەدى يلحام اليەۆ.
مەملەكەت باسشىسىنىڭ ايتۋىنشا، ازەربايجان مەن تۇركيا وداعى وڭىرلىك تۇراقتىلىقتى قامتاماسىز ەتۋدە، ىنتىماقتاستىقتى دامىتۋدا، كولىك بايلانىستارىن نىعايتۋدا جانە قاۋىپسىزدىكتى ساقتاۋدا ماڭىزدى ءرول اتقارادى.
پرەزيدەنت بەس جىل بۇرىن شۋشا قالاسىندا تۇركيا پرەزيدەنتىمەن بىرگە شۋشا دەكلاراتسياسىنا قول قويىلعانىن ەسكە سالدى. بۇل قۇجات ەكى ەل اراسىنداعى قارىم-قاتىناستى وداقتاستىق دەڭگەيگە كوتەرگەن.
ء«بىز تەك باۋىرلاس ءارى دوس حالىقتار عانا ەمەس، سونىمەن قاتار وداقتاستارمىز»، – دەپ تۇيىندەدى يلحام اليەۆ.
