قازاقستاننىڭ ءىرى قالالارىنداعى جانارماي قۇيۋ بەكەتتەرى (جقب) بەنزين باعاسىن كوتەردى. سوڭعى 20 كۇندە اي-92 ماركالى بەنزيننىڭ باعاسى شىمكەنت، الماتى جانە استانا قالالارىندا ورتا ەسەپپەن 4 تەڭگەگە وسكەن، دەپ حابارلايدى “ادىرنا”.
قازاقستاندا ءساۋىر ايىنان باستاپ جانارماي باعاسىن كوتەرۋگە قويىلعان موراتوري كۇشىن جويدى. العاشىندا باعا ايىنا شامامەن 1 تەڭگەدەن عانا وسسە، ماۋسىم ايىندا بەنزيننىڭ قىمباتتاۋى جەدەلدەي ءتۇستى.
شىلدە ايىندا دا بۇل ءۇردىس جالعاستى. «ياندەكس زاپراۆكي» سەرۆيسىنىڭ مالىمەتىنشە، سوڭعى 20 كۇن ىشىندە ءىرى جانارماي قۇيۋ بەكەتتەرى اي-92 بەنزينىنىڭ باعاسىن ورتا ەسەپپەن 4 تەڭگەگە كوتەرگەن.
باعالارىن ونلاين رەجيمدە جاريالايتىن استاناداعى ءىرى جانارماي قۇيۋ بەكەتتەرى اي-92 بەنزينىنىڭ قۇنىن ورتا ەسەپپەن 3,6 تەڭگەگە ءوسىردى. قازىر ەلوردادا ءبىر ليتر اي-92 بەنزينىن 245–247 تەڭگەگە قۇيۋعا بولادى.
ال الماتىداعى جانارماي قۇيۋ بەكەتتەرى بەنزين باعاسىن ورتا ەسەپپەن 4 تەڭگەگە كوتەردى. قازىرگى تاڭدا اي-92 بەنزينىنىڭ ءبىر ءليترى 249 تەڭگەدەن ساتىلىپ جاتىر.
شىمكەنتتەگى جانارماي قۇيۋ بەكەتتەرى سوڭعى 20 كۇندە اي-92 بەنزينىنىڭ باعاسىن شامامەن 4,3 تەڭگەگە ءوسىردى.
ايتا كەتەيىك، شىمكەنتتە ەلىمىزدەگى ەڭ تومەن جانارماي باعالارىنىڭ ءبىرى ساقتالعان. مۇندا اي-92 بەنزينىنىڭ ءبىر ءليترى شامامەن 232–235 تەڭگە تۇرادى.
«تالداۋ» اقپاراتتىق-تالداۋ جۇيەسىنىڭ دەرەگىنە سايكەس، 2026 جىلدىڭ باسىنان بەرى ماۋسىم ايىنىڭ قورىتىندىسى بويىنشا اي-92 بەنزينىنىڭ باعاسى ەل بويىنشا ورتا ەسەپپەن 2,8%-عا ءوستى.
ال وتكەن جىلدىڭ سايكەس كەزەڭىمەن سالىستىرعاندا بەنزين باعاسى 15,2%-عا قىمباتتاعان. سالىستىرۋ ءۇشىن، وسى كەزەڭدەگى قازاقستانداعى جىلدىق ينفلياتسيا دەڭگەيى 10,3%-دى قۇرادى.
ۇلتتىق ستاتيستيكا بيۋروسىنىڭ مالىمەتىنشە، قازىرگى ۋاقىتتا قازاقستان بويىنشا اي-92 بەنزينىنىڭ ورتاشا باعاسى ءبىر ليترىنە 240 تەڭگەنى قۇرايدى.
