الماتىداعى ءال-فارابي داڭعىلىندا ناۋرىز ايىندا بولعان جانتۇرشىگەرلىك جول اپاتىنان كەيىن قوزعالعان قىلمىستىق ىستەردىڭ ءبىرى قايتا جانداندى. اڭگىمە مەملەكەتتىك تىركەۋ نومىرلەرىن زاڭسىز بەرۋ دەرەگى بويىنشا جۇرگىزىلىپ جاتقان تەرگەۋ تۋرالى بولىپ وتىر، دەپ حابارلايدى “ادىرنا”.
ەسكە سالايىق، 26 ناۋرىزدا ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ ۆەدومستۆونىڭ وزىندىك قاۋىپسىزدىك دەپارتامەنتى اتالعان فاكتى بويىنشا قىلمىستىق كودەكستىڭ 362-بابىنىڭ 1-بولىگى («بيلىكتى نەمەسە لاۋازىمدىق وكىلەتتىكتەردى اسىرا پايدالانۋ») نەگىزىندە قىلمىستىق ءىس تىركەگەنىن حابارلاعان ەدى.
كەيىن، 3 ماۋسىمدا، قۇقىق قورعاۋ ورگاندارى قىلمىستىق قۇقىقبۇزۋشىلىق قۇرامىنىڭ جوقتىعىنا بايلانىستى ءىستى توقتاتقان. سول كەزدە تەرگەۋ بارىسىندا كىمنىڭ كۇدىكتى رەتىندە قارالعانى جاريا ەتىلمەگەن.
الايدا الماتى قالاسىنىڭ پروكۋراتۋراسى ءىس ماتەريالدارىن قايتا قاراپ، قوسىمشا تەرگەۋ جۇرگىزۋ قاجەت دەگەن شەشىم قابىلداعان.
«قىلمىستىق ءىس ماتەريالدارىن زەردەلەۋ ناتيجەسىندە قالا پروكۋراتۋراسى ءىستى قوسىمشا تەرگەۋگە قايتاردى. قازىرگى ۋاقىتتا سوتقا دەيىنگى تەرگەپ-تەكسەرۋ جالعاسىپ جاتىر»، – دەپ مالىمدەدى قاداعالاۋ ورگانى رەداكتسيانىڭ رەسمي ساۋالىنا بەرگەن جاۋابىندا.
پروكۋراتۋرا مالىمەتىنشە، قازىرگى ۋاقىتتا بۇل ءىس بويىنشا كۇدىكتى دەپ تانىلعان ەشكىم جوق.
