ەلىمىزدە قان دونورلارى ءۇشىن العاش رەت رەسمي تۇردە «قۇرمەتتى دونور» ماراپاتى تاعايىندالدى. بۇل تۋرالى بۇگىن، 13 شىلدەدە دەنساۋلىق ساقتاۋ مينيسترلىگى ايتتى، دەپ حابارلايدى «ادىرنا» ءتىلشىسى.
قۇرمەت بەلگىسىنىڭ العاشقى يەگەرلەرى بەكىتىلگەن تالاپتارعا تولىق سايكەس كەلەتىن 481 تۇراقتى دونور بولادى.
ۇكىمەتى قابىلداعان قاۋلىعا سايكەس ۆەدومستۆولىق توسبەلگى قازاقستان رەسپۋبليكاسىنىڭ ازاماتتارىنا، سونداي-اق شەتەلدىكتەر مەن ازاماتتىعى جوق ادامدارعا وتەۋسىز نەگىزدە دونورلىق جاساعانى ءۇشىن بەرىلەدى. اتاپ ايتقاندا، قان جانە (نەمەسە) ترومبوتسيت دونورلىعى – كەمىندە 40 رەت، قان پلازماسىنىڭ دونورلىعى – كەمىندە 70 رەت بولۋى ءتيىس.
«بۇل شەشىم ارقىلى ۇكىمەت ادام ءومىرىن قۇتقارۋ جولىندا تۇراقتى ءارى وتەۋسىز دونورلىق جاساپ جۇرگەن قازاقستاندىقتاردىڭ ەڭبەگىنە تاريحي ادىلدىك ورناتتى. ەندى ولاردىڭ يگى ءىسى ەرەكشە مارتەبەمەن ايقىندالىپ، جوعارى باعالانىپ وتىر»،- دەلىنگەن حابارلامادا.
ايتا كەتەيىك، جىل سايىن قازاقستاندا 180 مىڭنان استام ازامات دونور اتانىپ، 255 مىڭنان استام دونورلىق ءراسىم جاسايدى.
