قازاقستان جۋرناليستەر وداعىنىڭ باسقارما توراعاسى سەيتقازى ماتاەۆ 70 جاسقا تولدى. قر پرەزيدەنتى قاسىم-جومارت توقاەۆتىڭ جارلىعىمەن ول "قۇرمەت" وردەنىمەن ماراپاتتالدى.
كەيىنگى ۇرپاق بىلەر-بىلمەس، سەيتقازى اعا كىم ەدى؟ قازاقستاننىڭ جاڭا تاريحىندا اتى-ءجونى اتالۋى ءتيىس قايراتكەر ازاماتتىڭ بىرەر ەسىل ەڭبەگىن ەل ەسىنە سالايىن.
كسرو تاراپ، قازاقستان تاۋەلسىزدىك العان 90-جىلدارى يەسىز قالعان قازتاگ-تى (تاسس-تىڭ قازاق سسر-ىندەگى فيليالى) ء"تىرىلتىپ", جەكە باستاماسىمەن، ءوزىنىڭ قاراجاتىن جۇمساپ، ەلدىڭ اقپارات الەمىنە قوستى. بۇگىندە بۇل اگەنتتىك تانىمال جانە بەدەلدى باق سانالادى، ول تاراتاتىن اقپاراتقا وتاندىق جانە شەتەلدىك ينفورمەيشن-مەديا سىلتەمە جاسايدى.
تاعى دا سول تاقىر-تازا 90-جىلدارى جەتىمنىڭ كۇيىن كەشكەن قازاقستان جۋرناليستەر وداعىن قۇرىپ كەتۋدەن ساقتاپ قالىپ، مەملەكەتتىك ماڭىزى بار وسى قوعامدىق بىرلەستىكتى 25 جىلدان بەرى باسقارادى. وداق تاعايىنداعان "قازاقستاننىڭ قۇرمەتتى ءجۋرناليستى" اتاعىن جۋرناليستەر قاۋىمى مەملەكەتتىك ماراپاتتان بەتەر باعالى توسبەلگى سانايدى.
تاۋەلسىز قازاقستاندا ەڭ العاشقى ءباسپاسوز كلۋبىن اشقان ادام - سەيتقازى ماتاەۆ! سەكەڭ الماتىدا 2000-جىلداردىڭ باسىندا قۇرعان ۇلتتىق ءباسپاسوز كلۋبى تاۋەلسىز قوعامدىق-ساياسي پلاتفورماعا اينالدى. ەكى عاسىردىڭ ورتاسىندا نازارباەۆتىق جەكە دارا بيلىكتىڭ قۋدالاۋىنا تاپ بولعان، ساياسي ۇستانىمى مەن كورگەن قورلىعىن جاريا ەتۋگە تريبۋنا تاپپاعان: ساياساتكەرلەر - سەرىكبولسىن ءابدىلدين، اكەجان قاجىگەلدين، عازيز الدامجاروۆ، يرينا ساۆوستينا، زامانبەك نۇرقادىلوۆ،
نۇربولات ماسانوۆ، جارماحان تۇياقباي، اسىلبەك قوجاحمەتوۆ، پەرت سۆويك، بولاتحان تايجان، دوس كوشىم، جاسارال قۋانىشالين، ءامىرجان قوسانوۆ جانە باسقالار;
دۆك"-نىڭ العاشقى قۇرىلتايشىلارى بولات ءابىلوۆ، عالىمجان جاقيانوۆ، التىنبەك سارسەنباەۆ، وراز جاندوسوۆ، تولەن توقتاسىنوۆ، مۇحتار ابليازوۆ; قۋدالاۋعا تۇسكەن مەديانىڭ جەتەكشىلەرى، جۋرناليستەر - گۇلجان ەرعاليەۆا، سەيداحمەت قۇتتىقادام، ءشارىپ قۇراقباي، باتىرحان دارىمبەت، يرينا پەترۋشەۆا، وسى پوستتىڭ اۆتورى، بيگەلدى عابدۋللين، سەرگەي دۋۆانوۆ، باقىتگۇل ماكىمباي، ليرا بايسەيىتوۆا جانە تاعى باسقالار سەيتقازى ماتاەۆتىڭ تاۋەلسىز پلاتفورماسىندا باتىل ءباسپاسوز ءماسليحاتتارىن وتكىزدى.
ۇلتتىق ءباسپاسوز كلۋبىندا مارقۇم زامانبەك نۇرقادىلوۆ پرەزيدەنت نازارباەۆتىڭ وتستاۆكاسىن تالاپ ەتكەنى ءۇشىن ماتاەۆتىڭ ءوزى قىسىمعا ۇشىرادى. بيلىكتىڭ تالابىنا باس بەرمەگەن كلۋبتىڭ جەتەكشىسى كەيىننەن ناقاق جالامەن ءىستى بولىپ، 5 جىلعا سوتتالدى. ەكى جىلعا جۋىق تۇرمەدە وتىرىپ شىعىپ، بەرتىندە تولىق اقتالدى.
تاۋەلسىز جۋرناليستەرگە قامقور بولدى. وپپوزيتسيالىق "DAT" گازەتىن قولداپ، ۇلتتىق ءباسپاسوز كلۋبىنىڭ عيماراتىنا رەداكتسيانى تەگىن پانالاتتى.
قىمباتتى مەنىڭ سەيتقازى اكەيىم (تەگىم - سەيتقازىۇلى), 70 جاس مۇشەلتويىڭ قۇتتى بولسىن!
امان بول، ۇستاز!
100 جاسا، كوريفەي!
ەرمۇرات باپي
