قازاقستان جۋرناليستەر وداعى مۇشەلەرىنىڭ سانى 6 مىڭنان استى. بۇل تۋرالى وداق مالىمدەدى، دەپ حابارلايدى "ادىرنا".
«№6000 كۋالىك تاراز قالاسىندا بەرىلدى. باقىتتى كۋالىك يەگەرى – Taraz 24 تەلەارناسى ديرەكتورىنىڭ ورىنباسارى ايگەرىم وتارباەۆا. قازاقستان جۋرناليستەر وداعىنا قابىلداۋ ءراسىمى تارازدا ءوتتى، سالتاناتتى جاعدايدا وبلىستىق فيليال توراعاسى جاناباي ميلليونوۆ التى جاس ارىپتەسىنە كوپتەن كۇتكەن مۇشەلىك كىتاپشالاردى تابىستاپ، ولاردى كاسىبي قاۋىمداستىققا قابىلدانۋىمەن قۇتتىقتادى»، – دەپ حابارلادى دۇيسەنبى كۇنى وداق.
قازاقستان جۋرناليستەر وداعى – ەلدەگى ەڭ كونە ءارى ەڭ كوپ مۇشەسى بار قوعامدىق ۇيىم. 1959 جىلعى قاراشادا قۇرىلعان بۇل ۇيىم الدىڭعى بۋىن قالىپتاستىرعان داستۇرلەردى ساقتاپ، قىزمەتىن ءححى عاسىر تالاپتارىنا ساي جۇرگىزىپ كەلەدى. جىل سايىن ۇيىم قاتارى 100-150 ادامعا تولىعىپ وتىرادى، ال فيليالدارى ەلدىڭ بارلىق 16 وبلىسىندا جانە رەسپۋبليكالىق ماڭىزى بار ءۇش قالادا – الماتىدا، شىمكەنتتە جانە استانادا جۇمىس ىستەيدى. وڭىرلەردە جاس جۋرناليستەرگە ارنالعان سەمينارلار، ترەنينگتەر، ىسكەرلىك ويىندار، كونفەرەنتسيالار مەن دوڭگەلەك ۇستەلدەر وتكىزىلەدى. ستۋدەنتتەر مەن مەكتەپ وقۋشىلارى شتاتتان تىس ءتىلشى رەتىندە تارتىلىپ، بايقاۋلارعا جانە سپورتتىق جارىستارعا قاتىسادى. جىل سايىن ۇستەل ويىندارى، فۋتبول، ۆولەيبول، ۇستەل تەننيسى، باسقا دا سپورت تۇرلەرى، ءتىپتى بالىق اۋلاۋ بويىنشا تۋرنيرلەر وتكىزىلەدى. كوپتەگەن وڭىرلەردە ارقان تارتۋ، كۇرەس جانە تاعى دا باسقا ءداستۇرلى سايىس تۇرلەرى قايتا جاڭعىرتىلۋدا.
جۋرناليستيكا فاكۋلتەتى جوق كەيبىر وبلىستاردا فيليال باسشىلارى ولاردى اشۋ نەمەسە فيلولوگيا فاكۋلتەتى جانىنان بولىمشەلەر قۇرۋ ماسەلەلەرىن شەشىپ ءجۇر.
ارداگەرلەرمەن بايلانىستى ساقتاۋ ماڭىزدى باعىتتاردىڭ ءبىرى. جىل سايىن ولار كاسىبي مەرەكەنى اتاپ وتۋگە شاقىرىلىپ، ماراپاتتار مەن ەستەلىك سىيلىقتار تابىستالادى. «قازاقستاننىڭ قۇرمەتتى ءجۋرناليسى» مەدالى – وتاندىق جۋرناليستيكانىڭ دامۋىنا ەلەۋلى ۇلەس قوسقان ادامدارعا بەرىلەتىن جوعارى ناگرادا. كوپتەگەن وڭىرلەردە جىل سايىن ەسكە الۋ كۇندەرى وتكىزىلىپ، وندا ارىپتەستەردىڭ دوستارى مەن تۋىستارى ومىردەن وتكەن جۋرناليستەردى ەسكە الادى.
2024-2025 جىلدارى استانادا قازاقستان جۋرناليستەر وداعى باق-تىڭ وزەكتى ماسەلەلەرىنە ارنالعان ەكى ءىرى مەديافورۋم وتكىزدى.
مۇنداي ءىس-شارالار جۋرناليستيكا فاكۋلتەتتەرى جوق وڭىرلەر ءۇشىن ەرەكشە ماڭىزعا يە، سەبەبى ونداعى بۇقارالىق اقپارات قۇرالدارىندا ءارتۇرلى ماماندىق يەلەرى ەڭبەك ەتەدى. ءارتۇرلى سالاداعى كاسىبي ماماندار مەن ساراپشىلارمەن ارالاسۋ، ولاردىڭ تاجىريبەسى مەن ۇسىنىستارى جاس بۋىن ءۇشىن اسا قاجەت. وسى ماقساتقا قازاقستان جۋرناليستەر وداعى ۇيىمداستىراتىن جىل سايىنعى كونكۋرس تا قىزمەت ەتەدى، ونىڭ لاۋرەاتتارى ەلدىڭ بارلىق وڭىرلەرىنەن ۇزدىك وكىلدەر بولىپ تابىلادى. جەڭىمپازداردىڭ ەسىمدەرىن جاريالاۋ، اقشالاي سىيلىقتار، ەڭ باستىسى – ارىپتەستەردىڭ مويىنداۋى مەن جوعارى باعاسى جاس جۋرناليستەردىڭ تۇلعالىق دامۋى مەن كاسىبي بىلىكتىلىگىن ارتتىرۋعا قۋاتتى ىنتالاندىرۋ بولىپ تابىلادى.
