اسحات ايماعامبەتوۆ قازاق تىلىندەگى مۋلتفيلمدەر وتە از ەكەنىن ايتتى. دەپۋتات سول مۋلتفيلمدەردىڭ YouTube سياقتى قولجەتىمدى پلاتفورمالاردا جوقتىڭ قاسى ەكەنىن اتاپ ءوتتى، دەپ حابارلايدى “ادىرنا” ۇلتتىق پورتالى.
«قازاق تىلىندەگى مۋلتفيلمدەر وتە از، ال YouTube سياقتى قولجەتىمدى پلاتفورمالاردا مۇلدە جوقتىڭ قاسى. بۇگىنگى كۇنى بۇل ۇلكەن ماسەلە، ويتكەنى بالالار تەلەديداردان گورى ينتەرنەت پەن YouTube-تى كوبىرەك تاڭدايدى. بالالار “سيني تراكتور” مەن “ماشا ي مەدۆەد” سياقتى مۋلتفيلمدەرمەن شەكتەلمەي، ساپالى ءارى قىزىقتى قازاقشا مۋلتفيلمدەردى كورۋى ءتيىس.وسى ماقساتتا، كەلەسى جىلدىڭ بيۋدجەت جوباسىن قاراستىرۋ بارىسىندا، قازاق تىلىندەگى مۋلتفيلمدەر جاساۋعا 350 ميلليون تەڭگە ءبولۋدى جانە ولاردىڭ تەك تەلەديدارعا ەمەس، مىندەتتى تۇردە ينتەرنەتكە، سونىڭ ىشىندە YouTube-قا جۇكتەلۋىن قامتاماسىز ەتەتىن نورمانى زاڭعا ەنگىزدىك. بۇل بالالاردىڭ قازاق تىلىندە قىزىقتى كونتەنتكە قول جەتكىزۋ مۇمكىندىگىن كەڭەيتەدى دەپ سەنەمىز“، - دەگەن بولاتىن دەپۋتات.
وسى ماقساتتا “قازاقانيماتسيا” شب رەداكتورى ەرلان تولەۋتايعا ساۋال جولداپ، پىكىرىن بىلدىك.
- قازاق انيماتسياعا 350 ميلليون تەڭگە ءبولۋ تۋرالى جوسپار ايتىلعان ەدى. الداعى ۋاقىتتا قانداي جوبالاردى جۇزەگە اسىرۋ جوسپاردا بار؟
- ءيا، كەشە ءماجىلىس دەپۋتاتى اسحات ايماعانبەتوۆ مىرزا جالپى قازاقتىلدى انيماتسيالىق كونتتەنتتى ارتتىرۋ ءۇشىن ۇكىمەت بيۋدجەتىنەن 350 ميلليون تەڭگە ءبولۋ ماسەلەسىن كوتەردى. بۇل شىنىندا دا وتە وزەكتى ماسەلە. ويتكەنى ەلىمىزدىڭ جاس كورەرمەندەرىنە قازاق ءتىلدى انيماتسيالىق كونتەنت جەتىسپەۋشىلىگى قاتتى سەزىلەدى. ارينە ۇكىمەت مۇنىڭ الدىن الۋ شارالارىن قاراستىرىپ جاتىر. دەپۋتاتتارىمىز دا بۇل ماسەلەنىڭ وزەكتىلىگىن ايتىپ، دەر كەزىندە دابىل قاعۋدا. ءوز تاراپىمنان ايتارىم "قازاقانيماتسيا" شب قازاق ءتىلدى كونتەنت جەتىسپەۋشىلىگى جونىندەگى بۇل ولقىلىقتاردى جويۋعا ءوز ۇلەسىن قوسۋعا دايار جانە بۇعان شىعارماشىلىق جانە تەحنيكالىق رەسۋرستارى تولىق جەتەدى.
- قازاق انيماتسيانى دامىتۋ جولىندا نەگىزگى ماقسات قانداي؟
- 2022 جىلى مادەنيەت جانە سپورت مينيسترلىگىنىڭ شەشىمىمەن شاكەن ايمانوۆ اتىنداعى "قازاقفيلم" كينوستۋدياسى جانىنان "قازاقانيماتسيا" شب قۇرىلدى. ءۇش جىل ۋاقىت ىشىندە "قازاقانيماتسيا شب وتىزدان اسا پيلوتتىق انيماتسيالىق ءفيلمدى جارىققا شىعاردى. وسى فيلمدەردى جاساۋعا وتىزدان اسا شاعىن انيماتسيالىق ستۋديالار جۇمىلدىرىلدى. "قازاقانيماتسيا" شب ماقساتى – وسى وتاندىق ستۋديالاردىڭ شىعارماشىلىق جانە تەحنولوگيالىق الەۋەتىن ارتتىرۋ ارقىلى ەلىمىزدەگى انيماتسيا سالاسىندەعى باسەكەلەستىكتى كۇشەيتۋ. باسەكە بولعان جەردە ساپا دا بولادى ەمەس پە، مادەنيەت جانە اقپارات مينيسترلىگىنىڭ ءبىزدىڭ الدىمىزعا قويىپ وتىرعان تالابى دا وسى.
تاعى دا ايتا كەتەتىن ءبىر جايت – قازاقستاندا انيماتسيا ماماندارىن دايارلايتىن ەكى جوعارعى وقۋ ورنى بار ەكەندىگى بەلگىلى. "قازاقانيماتسيا" شب وسى جوو ورىندارىنىڭ ستۋدەنتتەرىنە ارنالعان ماستەر كلاستار ۇيىمداستىرۋدا. وسى ورايدا انيماتسيا سالاسىندا ۇزدىك بولىپ سانالاتىن ەلدەردىڭ بىلىكتى ۇستازدارى "قازاقانيماتسيا" شب كەلىپ، پراكتيكالىق دارىستەر وتكىزىپ، وتاندىق ماماندارمەن تاجىريبە الماسۋدا. ماسەلەن وسى ءۇش جىلدىڭ ىشىندە بىزگە فرانتسيا، تۇركيا، پولشا، رەسەي، يسپانيا ەلدەرىنەن تاجىريبەلى ۇستازدار كەلىپ كەتتى. وسى دارىستەردەن العان تالىمدەرىن "قازاقانيماتسيا " شب انيماتورلارى دا ءوز شىعارماشىلىعىنا قولدانىپ، يگىلىگىن كورۋدە.
- قازاق انيماتسياسىنىڭ ۇلتتىق ەرەكشەلىكتەرىن، مادەني قۇندىلىقتارى مەن تاريحي تۇلعالارىن كەڭىنەن ناسيحاتتاۋ ءۇشىن قانداي جاڭا جوبالار نەمەسە باستامالار قولعا الىنۋدا نە الداعى ۋاقىتتا جوسپاردا تۇر؟
- بۇل جەردە ايتا كەتەتىن ءبىر جايت – "قازاقانيماتسيا" ءاۋ باستان ۇلتتىق سيپاتتاعى انيماتسيالىق فيلمدەر ءتۇسىرىپ كەلە جاتقان شىعارماشىلىق بىرلەستىك رەتىندە بەلگىلى. الداعى ۋاقىتتا "قازاقانيماتسيا" شب بۇل باستى باعىتتان اينىماق ەمەس. كەلەشەكتە دە "قازاقانيماتسيا" شب بۇگىنگى جاس كورەرمەننىڭ رۋحاني سۇرانىسىن وتەيتىن جوبالاردى قولعا الۋدا. ول ءۇشىن – اڭىز، ەرتەگى، ميفتەردەگى قىزىقتى كەيىپكەرلەرىمىزدى سوناۋ باعزى داۋىردەن وسى زامانعا الىپ كەلۋدەمىز ياعني قازاق ەرتەگىلەرىنىڭ باستى كەيىپكەرلەرى ەرتوستىك پەن تولاعايلار XXI عاسىرعا كەلىپ، قازىرگى سمارتفون ۇستاعان بالالار اراسىندا ءومىر سۇرمەك ياعني ەرتەگى كەيىپكەرلەرى مەن بالاقايلار بىرگە ءجۇرىپ، باستارىنان نەشە ءتۇرلى شىتىرمان وقيعالاردى كەشىرمەك. ءسويتىپ ءبىز ەرتەگى كەيىپكەرلەرى مەن بۇگىنگى جاس ۇرپاقتى قاۋىشتىرۋدامىز. بۇل جاس جەتكىنشەكتەرىمىزدى اۋىز ادەبيەتىمەن تانىستىرۋدىڭ تىڭ ءتاسىلى. وسىنداي مۋلتفيلمدەردىڭ بىرنەشەۋىن جارىققا شىعارىپ تا ۇلگەردىك. مۇنداي مۋلتفيلمدەردىڭ كىشكەنتاي كورەرمەندەر تاراپىنان سۇرانىسقا يە ەكەندىگى سەزىلەدى. الداعى ۋاقىتتا وسىنداي جوبالاردى جۇزەگە اسىراتىن بولامىز.
