شاكەن ايمانوۆ اتىنداعى «قازاقفيلم» كينوستۋدياسىنا تيەسىلى عيماراتتىڭ ساتىلىمى تۋرالى اقپارات راستالمادى، دەپ حابارلايدى "ادىرنا" ۇلتتىق پورتالى Nege.kz-كە سىلتەمە جاساپ.
بۇگىن ءال-فارابي داڭعىلىندا ورنالاسقان باس عيمارات الدىنا ارداگەرلەر مەن كينو مايتالماندارى جينالىپ، پرەزيدەنتتەن قوردالانعان ماسەلەلەردى شەشىپ بەرۋىن سۇراعان.
الايدا بىرنەشە ساعاتتان سوڭ "قازاقفيلم" باسشىلىعى جەلىدەگى پاراقشاسىندا الماتى قالاسىنداعى رىسقۇلوۆ داڭعىلى، 101ب مەكەنجايىندا ورنالاسقان جەر تەلىمى مەن بۇرىنعى «قازكينوپروكات» عيماراتىنىڭ ساتىلعانى تۋرالى قاۋەسەتتەردى جوققا شىعارىپ، جازبا جاريالادى.
كينوستۋديانىڭ مالىمەتىنشە، كورسەتىلگەن اۋماقتاعى عيمارات "اپاتتى" دەپ تانىلعان. قاۋىپسىزدىكتى قامتاماسىز ەتۋ ماقساتىندا «قازاقفيلم» الماتى قالاسى اكىمدىگى وكىلدەرىنىڭ قاتىسۋىمەن كەشەندى ساراپتاما ۇيىمداستىرعان.
«مامانداردىڭ قورىتىندىسى نەگىزىندە بۇل عيماراتتى قاۋىپسىز پايدالانۋ بويىنشا ودان ءارى شەشىمدەر قابىلدانادى. جەر تەلىمى مەن عيمارات كەشەنى ساتىلدى دەگەن اقپارات جالعان. بۇل جالعان اقپاراتتى تاراتۋدى جالعاسا بەرسە، سوتقا جۇگىنۋ قۇقىعىمىزدى ساقتايمىز» دەلىنگەن كينوستۋديا جاساعان مالىمدەمەدە.
سونىمەن قاتار، «قازاقفيلم»وتكىزۋ رەجيمىنىڭ قاتاڭداۋى تۋرالى اقپاراتتى جوققا شىعاردى.
ايتا كەتەيىك، بۇگىن عانا كينوستۋديانىڭ الدىندا ءبىر توپ كينو وكىلدەرى جينالىپ، "قازاقفيلمگە" تيەسىلى عيماراتتىڭ جاعدايىن ايتقان ەدى.
