پروكۋرورلار الماتىدا ۇلتتىق كينەماتوگرافيانى قولداۋعا بولىنگەن بيۋدجەت قاراجاتىنىڭ ۇرلانعانىن اشكەرەلەدى، دەپ حابارلايدى «ادىرنا» ۇلتتىق پورتالى.
الماتى قالاسىنىڭ پروكۋراتۋراسى «شاكەن ايمانوۆ اتىنداعى قازاقفيلم» اكتسيونەرلىك قوعامىن تەكسەرۋ قورىتىندىسى بويىنشا، بيۋدجەت قاراجاتىن اسا ءىرى مولشەردە ۇرلاۋ فاكتىسىمەن سوتقا دەيىنگى تەرگەپ-تەكسەرۋدى باستادى. مالىمەتتەرگە سۇيەنسەك، فيلم تۇسىرۋگە باعىتتالعان 400 ميلليون تەڭگەدەن استام قاراجات جىمقىرىلعان.
سوتقا دەيىنگى تەرگەۋدى ەكونوميكالىق تەرگەۋ دەپارتامەنتى جۇرگىزىپ جاتىر.
ەسكە سالا كەتەيىك، 2021 جىلدىڭ قاڭتارىندا «قاسىم حان» تاريحي سەريالىنىڭ ءتۇسىرىلىمى كەزىندە 30 ميلليونعا جۋىق تەڭگەنىڭ ۇرلانعانى بەلگىلى بولدى. تەرگەۋ بارىسىندا اتالعان قىلمىسقا قاتىسى بار تۇلعالاردىڭ قىزمەت بابىن پايدالانىپ، پيروتەحنيكالىق زاتتاردى ساتىپ الۋعا بولىنگەن بيۋدجەت قاراجاتىن ۇرلاعانى دالەلدەندى.
«ادىرنا» ۇلتتىق پورتالى
