Qostanaı oblysy Jitiqara qalasynda jeke turǵyn úıde shyqqan órt saldarynan úı shatyry opyrylyp túsip, bes bala qaza tapty, dep habarlaıdy «Adyrna» ulttyq portaly.
Oblystyq ákimdiktiń habarlaýynsha, órt tańǵy saǵat 4:29-da bastalǵan. Órt sóndirýshiler oqıǵa ornyna 7 mınýt ishinde jetkenimen, úı tolyǵymen órtke oranǵan. Saǵat 6:08-de órt sóndirildi.
«Ókinishtisi, úıindini tazartý nátıjesinde 2011, 2016, 2018, 2019, 2022, 2023 jyly týǵan kámeletke tolmaǵan balalar úıden tabyldy. 2011 jyly týǵan úlken balasy ǵana aman qalǵan. Aldyn ala málimet boıynsha, balalardyń anasy keshkisin qurbysyna ketken. Kúıeýi túrmede otyr», - delingen oblystyq ákimdiktiń málimdemesinde.
Aldyn ala málimet boıynsha, pesh qaraýsyz qalyp, jalyn sodan paıda bolýy múmkin. Oqıǵanyń sebepterin mamandar anyqtaýda. Órt – tehnıkalyq zertteýge tapsyryldy.
Eske sala keteıik, osyǵan uqsas jaǵdaı bes jyl buryn Astana qalasy mańyndaǵy Kóktal shaǵyn aýdanynda da bolǵan edi. Ol kezde ata-analary túngi aýysymda jumysta júrip, úıinde jalǵyz qalǵan bes bala órt saldarynan qaza tapqan. Kórshileri órtti kórip kómekke umtylǵanymen, jalynnyń kúshti bolǵany sonsha, balalardy qutqaryp úlgermegen. Bes qyzdyń úlkeni nebári 13 jasta, al eń kishisi úsh aılyq sábı bolatyn. Osy oqıǵadan keıin, turmystyq jaǵdaı men peshtiń qaýipsizdigi máseleleri talqyǵa túsip, qoǵamdy beı-jaı qaldyrmady. Bul jaǵdaılar balalar qaýipsizdigin qamtamasyz etý men turmystyq jaǵdaıdyń jaqsarýyna úlken mán berý qajettigin taǵy bir ret kórsetip otyr
