تۇركيانىڭ بولۋ قالاسىنداعى كارتالكايا تاۋ شاڭعىسى كۋرورتىندا ورنالاسقان Grand Kartal قوناقۇيىندە بولعان ءورت سالدارىنان 36 بالا قازا تاپقان، دەپ حابارلايدى "ادىرنا" ۇلتتىق پورتالى Haberler.com سايتىنا سىلتەمە جاساپ.
قايعىلى وقيعا كەزىندە بالالاردىڭ كوپ بولۋىنىڭ سەبەبى ەلدە دەمالىس ۋاقىتىمەن ءتۇسىندىرىلدى.
باسىلىم قازا تاپقان بالالاردىڭ ءتىزىمىن جاريالاپ، ولاردىڭ بارلىعى 18 جاسقا تولماعانىن اتاپ ءوتتى. جۋرناليستەردىڭ مالىمەتىنشە، بۇل تراگەديا كەم دەگەندە 30 وتباسىن قامتىعان.
تۇرىك باق وسى كۇندەرى قازا بولعاندار تۋرالى ءجيى اقپاراتتار جاريالاپ وتىر. بۇعان دەيىن ءبىر اۋلەتتىڭ ون ءتورت ادامى وسى قرت كەزىندە قازا تاپقانى ايتىلدى.
قازىرگى ۋاقىتتا، بولۋ قالاسىنىڭ پروكۋراتۋراسى قوناقۇيدەگى ورتتەن 79 ادام قايتىس بولعانىن مالىمدەدى.
قىلمىستىق ءىس بويىنشا كۇدىكتىلەردىڭ سانى 15 ادامعا جەتتى. تۇركيانىڭ ادىلەت مينيسترلىگى قوناقۇيدىڭ يەسى، ديرەكتور جانە باسقارۋشىسى، Grand Kartal برەندىنە يەلىك ەتەتىن كومپانيانىڭ باسشىسى مەن بولۋ قالاسىنىڭ ۆيتسە-مەرى مەن ءورت ءسوندىرۋ قىزمەتىنىڭ ورىنباسارى قاماۋعا الىنعانىن ناقتىلادى.
ەسكە سالا كەتسەك، 21 قاڭتارعا قاراعان ءتۇنى تۇركيانىڭ كارتالكايا تاۋ شاڭعىسى كۋرورتىندا ءىرى ءورت ورىن الىپ، 79 ادام قازا تاپتى. تراگەدياعا بايلانىستى تۇركيا پرەزيدەنتى رەجەپ تايىپ ەردوعان 22 قاڭتاردى جالپىۇلتتىق ازا تۇتۋ كۇنى دەپ جاريالاعان ەدى.