10 قازان كۇنى مالتانىڭ استاناسى ۆاللەتتا ماڭىنداعى تا'قالي ستاديونىندا وتەتىن مالتا مەن تۇركىمەنستان اراسىنداعى جولداستىق كەزدەسۋ تۇركىمەنستان ۇكىمەتى ويىنشىلارىنىڭ ساپارعا شىعۋىنا رۇقسات بەرمەگەن سوڭ كەيىنگە قالدىرىلدى. بۇل تۋرالى مالتا فۋتبول فەدەراتسياسىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
«تۇرىكمەنستان فۋتبول قاۋىمداستىعى ءوز ەلىنىڭ بيلىگىنەن مالتاعا بارۋ ءۇشىن قاجەتتى رۇقساتتى الۋدا قيىندىقتار تۋىنداعاندىقتان، ماتچ وتكىزىلمەي قالدى»، - دەلىنگەن رەسمي مالىمدەمەدە.
انىقتالعانداي، حالىقارالىق ماتچتى فيفا، ۋەفا جانە ازيا فۋتبول كونفەدەراتسياسى (افك) ماقۇلدادى، ولاردىڭ وكىلدەرى مالتا سىرتقى ىستەر مينيسترلىگىمەن بىرگە جاعدايدى رەتتەۋگە تىرىستى، بىراق بارلىق ارەكەتتەر ءساتسىز اياقتالدى.
ايتا كەتەيىك، مالتا قۇراماسى 13 قازاندا وتەتىن ۋەفا ۇلتتار ليگاسىنىڭ مولدوۆاعا قارسى كەزدەسۋىنە دايىندىق اياسىندا تۇركىمەنستانمەن جولداستىق كەزدەسۋ وتكىزۋدى جوسپارلاعان بولاتىن.
مالىمەت بويىنشا، تۇركىمەنستاننان شىعۋ ءۇشىن ازاماتتار ارنايى رۇقسات الۋى كەرەك. بىراق بۇل دا جەتكىلىكسىز بولۋى مۇمكىن. تاۋەلسiز باق ۇشاق بيلەتتەرiن ساتىپ العان ازاماتتاردىڭ تۇركiمەنستاننان تۇسiندiرمەستەن شىعۋىنا رۇقسات ەتiلمەيدi دەپ ۇدايى حابارلاپ جاتىر. ال كوشى-قون قىزمەتىنىڭ قىزمەتكەرلەرى ەشبىر قۇجاتقا سىلتەمە جاسامايدى.
