تۇركىمەنستان پرەزيدەنتى سەردار بەردىمۇحامەدوۆ ەكونوميكا جانە ساياساتتانۋ ماماندىقتارى بويىنشا پروفەسسور اتاعىن الىپ، تۇركىمەنستان عىلىم اكادەمياسى اكادەميگى بولىپ سايلاندى. بۇل تۋرالى «التىن عاسىر» باسىلىمى جازدى، دەپ حابارلايدى "ادىرنا".
جاڭا عىلىمي مارتەبەلەر مەملەكەت باسشىسىنا تۇركىمەنستاندا 12 ماۋسىمدا اتاپ وتىلەتىن عىلىم كۇنى قارساڭىندا بەرىلدى. سالتاناتتى ءراسىم عىلىم اكادەمياسىندا ءوتتى.
بەردىمۇحامەدوۆكە پروفەسسور اتاعى ۇلتتىق جانە جالپىادامزاتتىق ماڭىزى بار عىلىمي-وندىرىستىك، يننوۆاتسيالىق-ونەركاسىپتىك، الەۋمەتتىك-ەكونوميكالىق جانە عىلىمي-تەحنيكالىق رەفورمالاردى جۇزەگە اسىرۋداعى زور ەڭبەگى، سونداي-اق بەيبىت ىشكى جانە سىرتقى ساياسات جۇرگىزىپ، حالىقارالىق ىنتىماقتاستىقتى كەڭەيتۋگە قوسقان ۇلەسى ءۇشىن بەرىلگەنى اتاپ ءوتىلدى.
سونىمەن قاتار ول حالىقتىڭ الەۋمەتتىك-ەكونوميكالىق جاعدايىن جاقسارتۋ، عىلىم مەن ءبىلىم بەرۋ سالالارىن دامىتۋ، دەنساۋلىق ساقتاۋ جۇيەسىن حالىقارالىق ستاندارتتارعا سايكەستەندىرۋ، ەكونوميكا مەن وندىرىستە جاڭا تەحنولوگيالاردى ەنگىزۋ، ءبىلىمدى جاس ۇرپاقتى تاربيەلەۋ جانە تۇركىمەنستاننىڭ حالىقارالىق بەدەلىن نىعايتۋ باعىتىنداعى قىزمەتى ءۇشىن اكادەميك بولىپ سايلاندى.
وسىلايشا، 44 جاستاعى سەردار بەردىمۇحامەدوۆ اكەسى — تۇركىمەنستاننىڭ ەكىنشى پرەزيدەنتى گۋربانگۋلى بەردىمۇحامەدوۆتىڭ جولىن قايتالادى. ەلدە اركاداگ («قامقورشى») دەگەن اتپەن تانىمال گۋربانگۋلى بەردىمۇحامەدوۆ مەديتسينا عىلىمدارىنىڭ دوكتورى، ەكونوميكا عىلىمدارىنىڭ دوكتورى، پروفەسسور ءارى اكادەميك بولعان.
ونىڭ اۆتورلىعىمەن مەديتسينا، فيلوسوفيا، مادەنيەت، رۋحانيات، الاباي تۇقىمدى يتتەر، اقالتەكە جىلقىلارى جانە سپورت تاقىرىپتارىنا ارنالعان 60-تان استام كىتاپ جارىق كورگەن. ال سەردار بەردىمۇحامەدوۆتىڭ اتىنان ازىرگە ءتورت كىتاپ جاريالانعان.
ايتا كەتەيىك، سەردار بەردىمۇحامەدوۆ 2001 جىلى س.ا. نيازوۆ اتىنداعى تۇركىمەن اۋىل شارۋاشىلىعى ۋنيۆەرسيتەتىن «ينجەنەر-تەحنولوگ» ماماندىعى بويىنشا تامامداعان. 2008–2011 جىلدارى تۇركىمەنستاننىڭ رەسەيدەگى ەلشىلىگىندە كەڭەسشى-ۋاكىل قىزمەتىن اتقاردى. وسى كەزەڭدە رەسەي سىرتقى ىستەر مينيسترلىگىنىڭ ديپلوماتيالىق اكادەمياسىندا «حالىقارالىق قاتىناستار» ماماندىعى بويىنشا ەكىنشى جوعارى ءبىلىم الدى.
2014 جىلى تۇركىمەنستان عىلىم اكادەمياسىندا كانديداتتىق ديسسەرتاتسياسىن قورعاپ، ال 2015 جىلى دوكتورلىق ديسسەرتاتسياسىن ءساتتى قورعاپ، تەحنيكا عىلىمدارىنىڭ دوكتورى عىلىمي دارەجەسىن الدى. 2022 جىلدىڭ ناۋرىزىندا تۇركىمەنستان پرەزيدەنتى بولىپ سايلاندى.
