تۇرعىن ەلوردانىڭ اكىمشىلىك سوتىنا ساۋدا جانە ينتەگراتسيا مينيسترلىگى اتىنان قازاقستان رەسپۋبليكاسىنىڭ ۇكىمەتىنە ۋاقىتتى قايتارۋدى تالاپ ەتىپ، اكىمشىلىك سوتقا جۇگىنگەن. الايدا، سوت تالابىن كەرى قايتارعان. بۇل تۋرالى استانا قالاسىنىڭ مامانداندىرىلعان اۋدانارالىق اكىمشىلىك سوتى مالىمدەدى, دەپ حابارلايدى “ادىرنا” ۇلتتىق پورتالى.
«تالاپ قويۋشىنىڭ باستاپقىدا مالىمدەگەن تالاپتارى اكىمشىلىك سوت ءىسىن جۇرگىزۋ تارتىبىمەن قارالۋعا جاتپايدى. وسىعان بايلانىستى سوتتىڭ بەلسەندى ءرولى قاعيداتىن ىسكە اسىرۋ شەڭبەرىندە سوتپەن تالاپ قويۋشىعا ءوز تالاپتارىن ناقتىلاۋ قۇقىعى ءتۇسىندىرىلىپ، تالاپتاردىڭ ءمانىن وزگەرتۋ (قورىتىندى شەشىمدى جانە ءتيىستى جاۋاپكەردى كورسەتۋ) ۇسىنىلدى. سوت بەلگىلەگەن مەرزىمدە سوتقا اكىمشىلىك تالاپتى ناقتىلاۋ نەمەسە تولىقتىرۋ تۋرالى ءوتىنىش تۇسكەن جوق، –دەلىنگەن سوت حابارلاماسىندا.
سوندىقتان، تالاپ قويۋشى ءوز قۇقىعىن پايدالانباي، تالاپتاردى ناقتىلاماۋىنا (وزگەرتپەدى) بايلانىستى تالابى كەرى قايتارىلعان.
اقپاراتقا سايكەس، ا. ەلوردانىڭ اكىمشىلىك سوتىنا ساۋدا جانە ينتەگراتسيا مينيسترلىگى اتىنان قازاقستان رەسپۋبليكاسىنىڭ ۇكىمەتىنە تالاپ قويىپ، اكىمشىلىك سوتقا جۇگىنگەن. ول ۇكىمەتتىڭ 2024 جىلدىڭ 19 قاڭتارىنداعى قاۋلىسىن زاڭسىز دەپ تانۋدى، ۇكىمەت جانىنداعى جۇمىس توبىنىڭ 2024 جىلعى 2 تامىزداعى «ۋاقىتتى قايتارايىق» پەتيتسياسىن قاناعاتتاندىرۋدان جانە اقپاراتقا قول جەتكىزۋدەن باس تارتۋ تۋرالى شەشىمىن زاڭسىز دەپ تانۋدى تالاپ ەتكەن.
ول سوت شەشىمى بويىنشا:
1) «قازاقستان رەسپۋبليكاسىنىڭ اۋماعىنداعى ۋاقىتتى ەسەپتەۋ ءتارتىبى تۋرالى» قازاقستان رەسپۋبليكاسى ۇكىمەتىنىڭ 2000 جىلعى 23 قاراشاداعى N 1749 قاۋلىسىنا وزگەرىستەر ەنگىزۋ تۋرالى» قازاقستان رەسپۋبليكاسى ۇكىمەتىنىڭ 2024 جىلعى 19 قاڭتارداعى قاۋلىسى زاڭسىز دەپ تانىلسىن;
2) ۇكىمەت جۇمىس توبىنىڭ 2024 جىلعى 2 تامىزداعى «ۋاقىتتى كەرى قايتارايىق» ءوتىنىشىن قاناعاتتاندىرۋدان جانە اقپاراتقا قول جەتكىزۋدەن باس تارتۋ تۋرالى شەشىمى زاڭسىز دەپ تانىلسىن;
3) 2024 جىلعى 1 تامىزداعى جاۋاپ زاڭسىز دەپ تانىلسىن;
4) 2024 جىلعى 27 تامىزداعى جاۋاپ زاڭسىز دەپ تانىلسىن.
سوت «تالاپكەردىڭ باستاپقى كورسەتىلگەن نىسانداعى تالاپتارى اكىمشىلىك ءىس جۇرگىزۋدە قاراۋعا جاتپايدى» دەپ ءتۇسىندىردى.
