"حالىق ۇنىنە قۇلاق اساتىن مەملەكەت" قاعيداسىن ورنىقتىرۋدى كوزدەيتىن رەسپۋبليكا پرەزيدەنتى قاسىم-جومارت توقاەۆتىڭ قازاقستان حالقىنا جولداۋىندا ايتىلعان تۇجىرىمدارى الاقانداعىداي – انىق، بەس ساۋساقتاي – بەلگىلى جۇرتتىڭ كوكەيىندەگى وزەكتى ماسەلەلەر ەكەنى اينا قاتەسىز اقيقات.
جاقسىدان – شاراپات
«ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى، سىيلى بولۋى كەرەك. ءوز كاسىبىن جەتىك مەڭگەرگەن ماماندار ۇلت ساپاسىن ارتتىرادى» دەگەن تۇجىرىم بۇگىنگى زاماننىڭ يگى داستۇرىنە اينالۋ ءۇشىن بۇل يدەيانى دارىپتەپ، قوعامدىق ساناعا سىڭىرۋگە قىزمەت ەتۋ – زامان تالابى. ارمانىنا ادال، ۋادەسىنە بەرىك، كاسىبىنە شىن بەرىلگەن، ەل ءۇشىن ايانباي قىزمەت ەتىپ، باقىتقا بولەنگەن جانداردىڭ ءومىرى مەن ەڭبەك جولىن ناسيحاتتايتىن پورترەتتىك وچەركتەر مەن ۇلت مۇددەسى ءۇشىن تەر توككەن ەڭبەك ەندىگىندەگى ەڭ ىزگى ۇجىمداردىڭ ۇلانعايىر ىستەرىن بايانداپ، شەجىرەسىنەن سىر شەرتەتىن دەرەكتى فيلمدەر توپتاماسى ءتۇسىرىلۋى كەرەك. سوندا وسكەلەڭ ۇرپاق الدىڭعى تولقىننىڭ تاريحىنان ءتالىم الىپ، ءوز ەلىنىڭ قاھارماندارىن تانىپ ونەگە تۇتاتىن بولادى.
ساقتىقتا قورلىق جوق
«كوكتەمدەگى الاپات تاسقىن بۇكىل ەلىمىز ءۇشىن ۇلكەن سىناق بولدى. قازىرگى زاماندا ءبىز كەز-كەلگەن قاتەرگە دايىن بولۋىمىز قاجەت. مەملەكەتتىڭ باتىل ارەكەتى مەن حالىقتىڭ ءوزارا تىلەكتەس بولۋىنىڭ ارقاسىندا اسا قيىن جاعدايدان امان-ەسەن وتتىك. دەگەنمەن، ورتالىق جانە جەرگىلىكتى بيلىك وكىلدەرى وسى وقيعادان ساباق الۋى كەرەك» دەگەن تۇجىرىم قالىڭ بۇقارانىڭ، ءبۇتىن ءبىر مەملەكەتتىڭ قاۋىپسىزدىگىن ساقتاۋ، تابيعاتتىڭ توسىن كۇشىنە توتەپ بەرە الاتىنداي ساقتىق شارالارىن ۇيىمداستىرىپ، الاپات وقيعالاردىڭ الدى الۋعا قاۋقارلى بولۋ قاجەت ەكەنىن ۇستىمىزدەگى جىل اياسىنداعى جەر سىلكىنىسى مەن سۋ تاسقىنى جەتەمىزگە جەتكىزدى. اسىرەسە، عىلىم مەن ءبىلىمنىڭ ورداسى، ارمانداردى جۇزەگە اسىراتىن ارەنا، ماحاببات پەن جاستىقتىڭ مەكەنى - اياۋلى الماتى جۇرتشىلىعى ءالى كۇنگە ۇرەي ۇستىندە. بۇل رەتتە، شىن مانىندە الماتى قالاسىنىڭ بيلىك وكىلدەرى بولعان وقيعالاردان ساباق الىپ، الدىن-الا تۇرعىنداردىڭ قاۋىپسىزدىگىن قامتاماسىز ەتەتىن عيماراتتار دايىندالىپ، سۋ قويمالارى مەن سۋ بۇعاتتارى جوندەۋدەن وتكىزىلۋى كەرەك. بۇل – ءبىر مەنىڭ عانا ەمەس، بارشا الماتىلىقتاردىڭ تىلەگى.
جيدەگۇل ابدىجادىلقىزى
ءال-فارابي اتىنداعى قازۇۋ ءباسپاسوز جانە ەلەكتروندى باق كافەدراسىنىڭ دوتسەنتى، فيلولوگيا عىلىمدارىنىڭ كانديداتى
