قازاقستان–قىتاي قاتىناستارى سوڭعى جىلدارى جۇيەلى تۇردە دامىپ، جاڭا ساپالىق دەڭگەيگە كوتەرىلدى. 2024 جىلى ەكىجاقتى ساۋدا اينالىمى 44 ملرد اقش دوللارىنا جەتىپ، رەكوردتىق كورسەتكىش ورناتتى. 2025 جىلى دا وڭ ديناميكا ساقتالۋدا. بۇل سەرىكتەستىكتىڭ تۇراقتى ءارى ۇزاقمەرزىمدى سيپاتىن دالەلدەيدى.
بۇگىندە ىنتىماقتاستىق تەك تاۋار اينالىمىمەن شەكتەلمەي، ەنەرگەتيكا، كولىك-لوگيستيكا، ونەركاسىپ جانە تسيفرلاندىرۋ باعىتتارىن قامتىپ وتىر. قازاقستان–قىتاي ىسكەرلىك كەڭەسى سياقتى الاڭدار ءىرى جوبالاردى ىلگەرىلەتۋگە جانە ينۆەستيتسيا تارتۋعا مۇمكىندىك بەرۋدە.
گۋمانيتارلىق سالاداعى بايلانىستار دا جاڭا دەڭگەيگە شىقتى. 2025 جىلدىڭ قازاقستانداعى قىتاي ءتۋريزمىنىڭ جىلى دەپ جاريالانۋى حالىقتار اراسىنداعى مادەني الماسۋدى كەڭەيتەدى. «لۋ بان» شەبەرحانالارىنىڭ اشىلۋى جانە بەيجىڭدە قازاقستان مادەنيەت ورتالىعىن قۇرۋ باستاماسى ءبىلىم مەن مادەنيەت سالاسىنداعى ىنتىماقتاستىقتىڭ ۇزاق مەرزىمدى نەگىزىن قالايدى.
وسى تۇرعىدان العاندا، پرەزيدەنت قاسىم-جومارت توقاەۆتىڭ تيانتسزين قالاسىنا ساپارى مەن قحر توراعاسى سي تسزينپينمەن كەزدەسۋى ەرەكشە ماڭىزعا يە. بۇل كەلىسسوزدەر ستراتەگيالىق سەرىكتەستىكتىڭ ءمانىن ناقتىلاپ قانا قويماي، الداعى جىلدارعا باعىت-باعدار بەردى. مۇنداي جوعارى دەڭگەيدەگى كەزدەسۋلەر ءوزارا سەنىمدى ارتتىرىپ، جاھاندىق باسەكەلەستىك جاعدايىندا ورتاق مۇددەلەردى ۇيلەستىرۋگە ىقپال ەتەدى.
قورىتىندىلاي كەلە، قازاقستان مەن قىتاي قاتىناستارىنىڭ قازىرگى قارقىنى ارىپتەستىكتىڭ بىرتىندەپ ءارتاراپتانىپ، جاڭا كەزەڭگە اياق باسقانىن ايقىن كورسەتىپ وتىر. بۇل ءۇردىس وڭىرلىك تۇراقتىلىق پەن دامۋ ءۇشىن شەشۋشى فاكتورعا اينالۋدا.
باۋىرجان اۋكەن، قسزي ازيالىق زەرتتەۋلەر ءبولىمىنىڭ جەتەكشى ساراپشىسى
