بەيسەنبى كۇنى الماتى وبلىستىق سوتىنىڭ سوت القاسى ادام ولتىرگەنى ءۇشىن سوتتالعان ازاماتتى مەرزىمىنەن بۇرىن بوساتۋ تۋرالى قاۋلىنىڭ كۇشىن جويدى، دەپ حابارلايدى “ادىرنا” ۇلتتىق پورتالى.
جاس الاش مالىمەتىنشە، بانكير ەرجان تاتىشەۆتى ولتىرگەنى ءۇشىن سوتتالعان مۇراتحان توقماديدى شارتتى تۇردە مەرزىمىنەن بۇرىن بوساتۋ تۋرالى قاۋلى كۇشىن جويعان. بۇل اقپاراتتى قوناەۆ سوتى مالىمدەگەن.
«الماتى وبلىسى قوناەۆ قالاسى سوتىنىڭ مۇراتحان توقماديدى شارتتى تۇردە مەرزىمىنەن بۇرىن بوساتۋ تۋرالى ءوتىنىشتى قاناعاتتاندىرۋ تۋرالى 26 شىلدەدەگى قاۋلىسىنىڭ كۇشى جويىلدى»، - دەدى سۋديا.
پروكۋرور توقماديدىڭ شارتتى تۇردە مەرزىمىنەن بۇرىن بوساتۋ تۋرالى ءوتىنىشىن قاناعاتتاندىرۋسىز قالدىرۋدى سۇراعان.
سوت كەزىندە مارقۇم ەرجان تاتىشەۆتىڭ ۇلى الپامىس تاتىشەۆ تە ءسوز سويلەپ، سوتتالۋشىنىڭ مەرزىمنەن بۇرىن بوساتىلۋىنا قارسى ەكەنىن ايتتى.
«مەن بۇكىل وتباسىمنىڭ اتىنان كىسى ولتىرگەنى ءۇشىن سوتتالعان مۇراتحان توقماديدى شارتتى تۇردە مەرزىمىنەن بۇرىن بوساتۋدان باس تارتۋدى سۇرايمىن. ول مەنىڭ اكەمنىڭ ءومىرىن قيدى جانە ونى جاقسى كورەتىن جانە باعالايتىن بارلىق ادامداردىڭ ءومىرىن جويدى. مەنىڭ اكەم ەرجان تاتىشەۆ جابىرلەنۋشى، بىراق ءبارىمىز دە وسى سالقىن قاندى جانە قاندى قىلمىستىڭ قۇربانى بولىپ، التى جارىم جىل عانا جازاسىن وتەپ، قانىشەردىڭ بوستاندىققا شىعۋىنا قارسىمىز»، - دەدى ول.
مۇراتحان توقمادي بۇعان دەيىن شارتتى تۇردە مەرزىمىنەن بۇرىن بوساتۋ تۋرالى ءۇش رەت ءوتىنىش بەرىلىپتى.
قىلمىسكەر دەپ تانىلعان توقمادي 2017 جىلى بانكير ەرجان تاتىشەۆتى ولتىرگەنىن مويىنداپ، بۇعان مۇحتار ءابليازوۆ تاپسىرىس بەرگەنىن مالىمدەگەن بولاتىن.
