Бейсенбі күні Алматы облыстық сотының сот алқасы адам өлтіргені үшін сотталған азаматты мерзімінен бұрын босату туралы қаулының күшін жойды, деп хабарлайды “Адырна” ұлттық порталы.
Жас Алаш мәліметінше, банкир Ержан Тәтішевті өлтіргені үшін сотталған Мұратхан Тоқмәдиді шартты түрде мерзімінен бұрын босату туралы қаулы күшін жойған. Бұл ақпаратты Қонаев соты мәлімдеген.
«Алматы облысы Қонаев қаласы сотының Мұратхан Тоқмәдиді шартты түрде мерзімінен бұрын босату туралы өтінішті қанағаттандыру туралы 26 шілдедегі қаулысының күші жойылды», - деді судья.
Прокурор Тоқмәдидің шартты түрде мерзімінен бұрын босату туралы өтінішін қанағаттандырусыз қалдыруды сұраған.
Сот кезінде марқұм Ержан Тәтішевтің ұлы Алпамыс Тәтішев те сөз сөйлеп, сотталушының мерзімнен бұрын босатылуына қарсы екенін айтты.
«Мен бүкіл отбасымның атынан кісі өлтіргені үшін сотталған Мұратхан Тоқмәдиді шартты түрде мерзімінен бұрын босатудан бас тартуды сұраймын. Ол менің әкемнің өмірін қиды және оны жақсы көретін және бағалайтын барлық адамдардың өмірін жойды. Менің әкем Ержан Тәтішев жәбірленуші, бірақ бәріміз де осы салқын қанды және қанды қылмыстың құрбаны болып, алты жарым жыл ғана жазасын өтеп, қанішердің бостандыққа шығуына қарсымыз», - деді ол.
Мұратхан Тоқмәди бұған дейін шартты түрде мерзімінен бұрын босату туралы үш рет өтініш беріліпті.
Қылмыскер деп танылған Тоқмәди 2017 жылы банкир Ержан Тәтішевті өлтіргенін мойындап, бұған Мұхтар Әблязов тапсырыс бергенін мәлімдеген болатын.
