مۇحتار ابليازوۆكە بىرنەشە جىل بويى تۇرىپ جاتقان فرانتسيادان كەتۋگە 30 كۇن بەرىلدى. بۇل تۋرالى ءابليازوۆ Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
جۇما كۇنى تۇستەن كەيىن مەن اتقارۋشى پوليتسيادان 30 كۇن ىشىندە فرانتسيادان كەتىپ، مەنى قابىلداۋعا دايىن ەلگە بارۋىم كەرەك دەگەن بۇيرىق الدىم. ولار 2022 جىلعى 8 جەلتوقسانداعى سوت شەشىمىنە سۇيەنىپ وتىر، - دەدى ءابليازوۆ.
ول 2020 جىلدىڭ قىركۇيەگىندە فرانتسيانىڭ وعان ساياسي باسپانا بەرگەنىن ەسكە سالدى. الايدا 2 جىلدان كەيىن سوت ونى ساياسي باسپاناسىنان ايىردى. ەكس-بانكير فرانتسۋز سوتىنىڭ شەشىمىندە ساياسي استار بار ەكەنىن جانە بۇل بۇرىن-سوڭدى قابىلدانباعان شەشىم ەكەنىن ايتتى.
بۇل جەردە ولار ماعان اقش سياقتى باسقا ەلگە نەمەسە كەز كەلگەن وزگە دە كورشى مەملەكەتكە كەتۋدى ۇسىندى. بىراق مەندە ۆيزا دا، تولقۇجات تا جوق. سوندىقتان مەن ەشقايدا كەتە المايمىن. مەندە سوتقا شاعىمدانۋعا قۇقىعىم بار جانە ونى پايدالانامىن، - دەپ قوستى ءابليازوۆ.
ەسكە سالايىق، ابليازوۆكە قاتىستى قازاقستاندا جانە بىرقاتار باسقا ەلدەردە قىلمىستىق ىستەر قوزعالعان. سونداي-اق 2020 جىلدىڭ جەلتوقسان ايىندا مۇحتار ءابليازوۆ رەسەيدە بتا بانك ءىسى بويىنشا سىرتتاي 15 جىلعا باس بوستاندىعىنان ايىرىلعان. رەسەي سوتى ءابليازوۆتىڭ ءۇش جىل ىشىندە – 2006-2009 جىلدار ارالىعىندا قول استىنداعى قىزمەتكەرلەرىمەن بىرگە بانكتەن 58 ميلليارد رۋبل، ياعني 330,3 ميلليارد تەڭگە ۇرلاعانىن انىقتادى.
ال قازاقستاندا بانكير سىرتتاي 20 جىلعا باس بوستاندىعىنان ايىرىلعان – 2017 جىلى ول اقشا جىمقىرعانى ءۇشىن كىنالى بولاتىن. 2022 جىلدىڭ جەلتوقسان ايىنىڭ باسىندا مۇحتار ءابليازوۆ فرانتسيادا بوسقىن مارتەبەسىنەن ايىرىلعانى بەلگىلى بولدى.
بۇل رەتتە فرانتسۋزدىق باق ءابليازوۆتىڭ قازاقستانعا ەكستراديتسيالانۋى مۇمكىن ەكەنىن جازعان ەدى. 2023 جىلدىڭ قاڭتارىندا قازاقستان رەسپۋبليكاسىنىڭ باس پروكۋراتۋراسى قازىرگى ۋاقىتتا قازاقستان مەن فرانتسيا اراسىندا ەكستراديتسيالاۋ تۋرالى كەلىسىم جاسالماعانىن ءتۇسىندىردى. وسى جىلدىڭ مامىر ايىندا فرانتسيانىڭ كاسساتسيالىق سوتى مۇحتار ابليازوۆكە قاتىستى سەنىمگە قيانات جاساۋ جانە اقشانى جىلىستاتۋ ءىسى بويىنشا ءىستى توقتاتۋ تۋرالى اپەللياتسيالىق سوت شەشىمىنىڭ كۇشىن جويعانى حابارلانعان بولاتىن.
