"ادىرنا" ۇلتتىق پورتالىندا “قايىڭ اعاشى 3,5 ميلليون تەڭگە تۇرادى، ال مەملەكەتتىك ءتىل شە؟” دەگەن سىني ماقالا جاريالانعان بولاتىن. سول ماتەريالعا بايلانىستى اۋداندىق اۋرۋحانا مەكەمەسى رەسمي جاۋاپ بەردى، دەپ حابارلايدى ادىرنا ۇلتتىق پورتالى.
ءبىز اتالعان ماقالادا سولتۇستىك قازاقستان وبلىسى اكىمدىگىنىڭ دەنساۋلىق ساقتاۋ باسقارماسىنا قاراستى شال اقىن اۋداندىق اۋرۋحاناسى 3 500 130 تەڭگەگە 170 تەكشە مەتر قايىڭ اعاشىن ساتىپ الۋعا تەندەر جاريالاعانىن، مەملەكەتتىك ساتىپ الۋدىڭ تەحنيكالىق سيپاتتاماسىنىڭ قازاقشا نۇسقاسىن مۇلدەم ءتۇسىنۋ مۇمكىن ەمەستىگىن جازعان ەدىك.
اۋداندىق اۋرۋحانانىڭ مەملەكەتتىك تىلگە بۇلاي نەمقۇرايلى قاراۋىنىڭ سەبەبىن سۇراپ وبلىستىق دەنساۋلىق باسقارماسىنا حات تا جولداعانبىز.
وبلىستىق باسقارما رەسمي حاتتى اۋدانعا قاراي ىسىرا سالسا كەرەك، اۋداننان تومەندەگى حات كەلدى ء(ماتىندى وزگەرتپەي ۇسىنامىز):
“1. ا.ب. ستەپانوۆا – مەملەكەتتىك تىلدەگى قۇجاتتاردىڭ رەداكتورى بار.
2. مەملەكەتتىك ساتىپ الۋ جونىندەگى بۋگالتەر س.ۆ.ۆولوگودسكايا 2024 جىلدىڭ 17 شىلدەسىندە مەملەكەتتىك ساتىپ الۋ جەلىسىنە 170 تەكشە مەتر «قايىڭ اعاشىن» ساتىپ الۋ ءوتىنىمى مەملەكەتتىك تىلدە اۋدارماسىن مەكەمەنىڭ مەملەكەتتىك تىلدەگى قۇجاتتاردىڭ رەداكتورىنا بەرمەستەن ءوز ەركىمەن جۇكتەگەنىن حابارلايدى. قازىرگى تاڭدا مەملەكەتتىك ساتىپ الۋ ەسەپشىسى س.ۆ. ۆولوگودسكايا 2024 جىلدىڭ 22 شىلدەسىنەن 2024 جىلدىڭ 26 تامىزىنا دەيىن كەزەكتى ەڭبەك دەمالىسىندا بولۋىنا بايلانىستى تارتىپتىك جازا قولدانا المايتىندىعىن حابارلايدى. “قازاقستان رەسپۋبليكاسىنداعى تiل تۋرالى” 1997 جىلعى 11 شiلدەدەگى No151 قازاقستان رەسپۋبليكاسىنىڭ زاڭىن ساقتاۋ ماقساتىندا، مەكەمە ديرەكتورىنىڭ باقىلاۋىنا قاتاڭ تۇردە الىنعاندىعىن حابارلايدى” دەلىنگەن.
مەملەكەتتىك مەكەمەنىڭ مەملەكەتتىك ساتىپ الۋ سايتىندا مەملەكەتتىك ءتىلدى قورلاۋىنا “كىشكەنتاي قىزمەتكەر” ۆولوگودسكايا ەمەس، تۇتاستاي وبلىستىق دەنساۋلىق ساقتاۋ باسقارماسى جاۋاپتى. سونى بىلە تۇرا بار جاۋاپكەرشىلىكتى ۆولوگودسكاياعا اۋدارا سالىپ، ونى “ەڭبەك دەمالىسىندا جۇرگەندىكتەن جازالاي المادىق” دەپ تۇلكىبۇلتاڭعا سالۋ سولتۇستىك قازاقستان وبلىسى دەنساۋلىق ساقتاۋ باسقارماسىنىڭ مەملەكەتتىك تىلگە دەگەن كوزقاراسىنىڭ قانداي ەكەنىن ايعاقتاسا كەرەك.
ءبىز مەملەكەتتىك ساتىپ الۋ سايتىنداعى وسى مەكەمەنىڭ ماقالا جازىلعانعا دەيىنگى دە، ماقالا جازىلعاننان كەيىنگى دە قۇجاتتارىن ءسۇزىپ شىقتىق. ونداعى سوراقى قاتەلىكتەردى كورىپ، جاۋاپ حاتتا جازىلعان “مەملەكەتتىك تىلدەگى قۇجاتتاردىڭ رەداكتورى بار” دەگەن سوزدەرىنە دە سەنە الماي وتىرمىز.
سولتۇستىك قازاقستان وبلىسى دەنساۋلىق باسقارماسىنىڭ قۇجاتتارىنداعى ورەسكەل قاتەلىكتەر تۋرالى الداعى ۋاقىتتا تاراتىپ جازاتىن بولامىز. ايتپەسە، جاۋاپ حاتقا سەنسەك، جاي عانا اۋداندىق اۋرۋحانانىڭ ەسەپشىسى “ۆولوگودسكايا حانىم” قۇددى بۇكىل سقو دەنساۋلىق باسقارماسىنىڭ مەملەكەتتىك ساتىپ الۋ سايتىنداعى مەمتىلدەگى قۇجاتتارىنىڭ ءبارىن قاتە-قاتە اۋدارىپ، ونىسىن رەداكتورعا دا وقىتپاي جۇكتەپ جاتقانداي كورىنەدى ەكەن.
اقان اسىل
ادىرنا ۇلتتىق پورتالى
