"Adyrna" ulttyq portalynda “Qaıyń aǵashy 3,5 mıllıon teńge turady, al memlekettik til she?” degen synı maqala jarııalanǵan bolatyn. Sol materıalǵa baılanysty aýdandyq aýrýhana mekemesi resmı jaýap berdi, dep habarlaıdy Adyrna ulttyq portaly.
Biz atalǵan maqalada Soltústik Qazaqstan oblysy ákimdiginiń densaýlyq saqtaý basqarmasyna qarasty Shal aqyn aýdandyq aýrýhanasy 3 500 130 teńgege 170 tekshe metr qaıyń aǵashyn satyp alýǵa tender jarııalaǵanyn, memlekettik satyp alýdyń tehnıkalyq sıpattamasynyń qazaqsha nusqasyn múldem túsiný múmkin emestigin jazǵan edik.
Aýdandyq aýrýhananyń memlekettik tilge bulaı nemquraıly qaraýynyń sebebin surap oblystyq densaýlyq basqarmasyna hat ta joldaǵanbyz.
Oblystyq basqarma resmı hatty aýdanǵa qaraı ysyra salsa kerek, aýdannan tómendegi hat keldi (mátindi ózgertpeı usynamyz):
“1. A.B. Stepanova – memlekettik tildegi qujattardyń redaktory bar.
2. Memlekettik satyp alý jónindegi býgalter S.V.Vologodskaıa 2024 jyldyń 17 shildesinde memlekettik satyp alý jelisine 170 tekshe metr «Qaıyń aǵashyn» satyp alý ótinimi memlekettik tilde aýdarmasyn mekemeniń memlekettik tildegi qujattardyń redaktoryna bermesten óz erkimen júktegenin habarlaıdy. Qazirgi tańda memlekettik satyp alý esepshisi S.V. Vologodskaıa 2024 jyldyń 22 shildesinen 2024 jyldyń 26 tamyzyna deıin kezekti eńbek demalysynda bolýyna baılanysty tártiptik jaza qoldana almaıtyndyǵyn habarlaıdy. “Qazaqstan Respýblıkasyndaǵy til týraly” 1997 jylǵy 11 shildedegi No151 Qazaqstan Respýblıkasynyń Zańyn saqtaý maqsatynda, mekeme dırektorynyń baqylaýyna qatań túrde alynǵandyǵyn habarlaıdy” delingen.
Memlekettik mekemeniń memlekettik satyp alý saıtynda memlekettik tildi qorlaýyna “kishkentaı qyzmetker” Vologodskaıa emes, tutastaı oblystyq densaýlyq saqtaý basqarmasy jaýapty. Sony bile tura bar jaýapkershilikti Vologodskaıaǵa aýdara salyp, ony “eńbek demalysynda júrgendikten jazalaı almadyq” dep túlkibultańǵa salý Soltústik Qazaqstan oblysy densaýlyq saqtaý basqarmasynyń memlekettik tilge degen kózqarasynyń qandaı ekenin aıǵaqtasa kerek.
Biz memlekettik satyp alý saıtyndaǵy osy mekemeniń maqala jazylǵanǵa deıingi de, maqala jazylǵannan keıingi de qujattaryn súzip shyqtyq. Ondaǵy soraqy qatelikterdi kórip, jaýap hatta jazylǵan “memlekettik tildegi qujattardyń redaktory bar” degen sózderine de sene almaı otyrmyz.
Soltústik Qazaqstan oblysy densaýlyq basqarmasynyń qujattaryndaǵy óreskel qatelikter týraly aldaǵy ýaqytta taratyp jazatyn bolamyz. Áıtpese, jaýap hatqa sensek, jaı ǵana aýdandyq aýrýhananyń esepshisi “Vologodskaıa hanym” quddy búkil SQO densaýlyq basqarmasynyń memlekettik satyp alý saıtyndaǵy memtildegi qujattarynyń bárin qate-qate aýdaryp, onysyn redaktorǵa da oqytpaı júktep jatqandaı kórinedi eken.
Aqan Asyl
Adyrna ulttyq portaly
