"Adyrna" ūlttyq portalynda “Qaiyŋ aǧaşy 3,5 million teŋge tūrady, al memlekettık tıl şe?” degen syni maqala jariialanǧan bolatyn. Sol materialǧa bailanysty audandyq auruhana mekemesı resmi jauap berdı, dep habarlaidy Adyrna ūlttyq portaly.
Bız atalǧan maqalada Soltüstık Qazaqstan oblysy äkımdıgınıŋ densaulyq saqtau basqarmasyna qarasty Şal aqyn audandyq auruhanasy 3 500 130 teŋgege 170 tekşe metr qaiyŋ aǧaşyn satyp aluǧa tender jariialaǧanyn, memlekettık satyp aludyŋ tehnikalyq sipattamasynyŋ qazaqşa nūsqasyn müldem tüsınu mümkın emestıgın jazǧan edık.
Audandyq auruhananyŋ memlekettık tılge būlai nemqūraily qarauynyŋ sebebın sūrap oblystyq densaulyq basqarmasyna hat ta joldaǧanbyz.
Oblystyq basqarma resmi hatty audanǧa qarai ysyra salsa kerek, audannan tömendegı hat keldı (mätındı özgertpei ūsynamyz):
“1. A.B. Stepanova – memlekettık tıldegı qūjattardyŋ redaktory bar.
2. Memlekettık satyp alu jönındegı bugalter S.V.Vologodskaia 2024 jyldyŋ 17 şıldesınde memlekettık satyp alu jelısıne 170 tekşe metr «Qaiyŋ aǧaşyn» satyp alu ötınımı memlekettık tılde audarmasyn mekemenıŋ memlekettık tıldegı qūjattardyŋ redaktoryna bermesten öz erkımen jüktegenın habarlaidy. Qazırgı taŋda memlekettık satyp alu esepşısı S.V. Vologodskaia 2024 jyldyŋ 22 şıldesınen 2024 jyldyŋ 26 tamyzyna deiın kezektı eŋbek demalysynda boluyna bailanysty tärtıptık jaza qoldana almaityndyǧyn habarlaidy. “Qazaqstan Respublikasyndaǧy til turaly” 1997 jylǧy 11 şildedegı No151 Qazaqstan Respublikasynyŋ Zaŋyn saqtau maqsatynda, mekeme direktorynyŋ baqylauyna qataŋ türde alynǧandyǧyn habarlaidy” delıngen.
Memlekettık mekemenıŋ memlekettık satyp alu saitynda memlekettık tıldı qorlauyna “kışkentai qyzmetker” Vologodskaia emes, tūtastai oblystyq densaulyq saqtau basqarmasy jauapty. Sony bıle tūra bar jauapkerşılıktı Vologodskaiaǧa audara salyp, ony “eŋbek demalysynda jürgendıkten jazalai almadyq” dep tülkıbūltaŋǧa salu Soltüstık Qazaqstan oblysy densaulyq saqtau basqarmasynyŋ memlekettık tılge degen közqarasynyŋ qandai ekenın aiǧaqtasa kerek.
Bız memlekettık satyp alu saityndaǧy osy mekemenıŋ maqala jazylǧanǧa deiıngı de, maqala jazylǧannan keiıngı de qūjattaryn süzıp şyqtyq. Ondaǧy soraqy qatelıkterdı körıp, jauap hatta jazylǧan “memlekettık tıldegı qūjattardyŋ redaktory bar” degen sözderıne de sene almai otyrmyz.
Soltüstık Qazaqstan oblysy densaulyq basqarmasynyŋ qūjattaryndaǧy öreskel qatelıkter turaly aldaǧy uaqytta taratyp jazatyn bolamyz. Äitpese, jauap hatqa sensek, jai ǧana audandyq auruhananyŋ esepşısı “Vologodskaia hanym” qūddy bükıl SQO densaulyq basqarmasynyŋ memlekettık satyp alu saityndaǧy memtıldegı qūjattarynyŋ bärın qate-qate audaryp, onysyn redaktorǧa da oqytpai jüktep jatqandai körınedı eken.
Aqan Asyl
Adyrna ūlttyq portaly
Ūqsas jaŋalyqtar
