اسكەرگە ءوز اياعىمەن كەتىپ، مۇگەدەك بولىپ ورالعان سارباز ەربايان مۇحتاردىڭ ۆيدەوسى الەۋمەتتىك جەلىدە ۇلكەن رەزونانس تۋدىردى. جاعدايعا قاتىستى مينيسترلىك تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
جەلىدە تاراعان ۆيدەودا ەربايان مۇحتاردىڭ اسكەرگە ءوز ەركىمەن كەتكەنى، الايدا، كەيىنىرەك اۋرۋحاناعا ءتۇسىپ، بۇگىندە دارمەنسىز كۇيدە جاتقانى ايتىلعان. جىگىت كومادا 6 ايدان استام ۋاقىت بويى جاتقان.
ەربايان مۇحتار اسكەردە قىزمەت ەتۋ كەزىندە باسىنان جاراقات العان. قازىر ول سويلەي المايدى، تاماقتانا المايدى جانە وزدىگىنەن دەم الا المايدى. ۇلتتىق ۇلاننىڭ ءباسپاسوز قىزمەتى جاراقات الۋ دەرەگى بويىنشا تەرگەۋ باستالعانىن مالىمدەدى.
"قاتارداعى ەربايان مۇحتار باسىنان جاراقات الۋ دەرەگى بويىنشا قىلمىستىق كودەكستىڭ 440-بابى، 3-بولىگى، 4-تارماعى بويىنشا قىلمىستىق ءىس قوزعالدى ("اسكەري قىزمەتشىلەر اراسىنداعى دەنساۋلىققا اۋىر زيان كەلتىرۋمەن ءوزارا قارىم-قاتىناستاردىڭ جارعىلىق ەرەجەلەرىن بۇزۋ"). قازىرگى ۋاقىتتا بارلىق قاجەتتى ساراپتاما تاعايىندالدى. سوتالدى تەرگەۋ جالعاسىپ جاتىر. تەرگەۋ بارىسى ءىىم ءىىد باسشىلىعىنىڭ باقىلاۋىندا", - دەلىنگەن ءىىم ۇلتتىق ۇلانىنىڭ ءباسپاسوز قىزمەتىنىڭ حابارلاماسىندا.
سونداي-اق، ۆەدومستۆو وڭالتۋ اياقتالعاننان كەيىن "اتا-اناسىنىڭ سۇراۋى بويىنشا ەربايان مۇحتار ۇيىنە جىبەرىلدى" دەپ مالىمدەدى. جاس جىگىتتىڭ مۇگەدەكتىگىن رەسىمدەۋ ماسەلەسى شەشىلىپ جاتىر.
"سونىمەن قاتار، ءىىم ۇلتتىق ۇلانىنىڭ باس قولباسشىلىعى بەحتەرەۆ اتىنداعى پسيحياتريا جانە نەۆرولوگيا ۇلتتىق مەديتسينالىق زەرتتەۋ ورتالىعىنا، كيروۆ اتىنداعى اسكەري-مەديتسينالىق اكادەمياعا جانە رەسەي فەدەراتسياسىنىڭ پروفەسسور پولەنوۆ اتىنداعى رەسەي عىلىمي-زەرتتەۋ نەيروحيرۋرگيالىق ينستيتۋتىنا، سونداي-اق تۇركيا ەلشىلىگىنە كەڭەس كومەك كورسەتۋ جانە اۋرۋحاناعا جاتقىزۋ ماسەلەسىن قاراۋ ءۇشىن حاتتار جولدادى", - دەپ حابارلادى ءىىم ۇلتتىق ۇلانىنىڭ ءباسپاسوز قىزمەتى.
