ەلوردادا كوپىردەن سەكىرگەن جاس قىزدى قۇتقارعان قر ءىىم ۇلتتىق ۇلان جاۋىنگەرلەرى ماراپاتتالدى، دەپ حابارلايدى “ادىرنا” ۇلتتىق پورتالى.
«مەنىڭ ورنىمدا باسقا ناعىز ەر جىگىت بولسا، ول دا وسىلاي جاسار ەدى. قورقاق بولىپ جۇرگەننەن گورى، حالىق جادىندا باتىر بولىپ ساقتالىپ قالعان ارتىق»، - دەدى قاتارداعى جاۋىنگەر ناريمان مىرزاحمەتوۆ.
استانادا كوپىردەن ەسىل وزەنىنە سەكىرگەن قىزدى قۇتقارعان ۇلاندىقتار ماراپاتتالدى.
قازاقستان رەسپۋبليكاسى ىشكى ىستەر ءمينيسترىنىڭ ورىنباسارى – ۇلتتىق ۇلان باس قولباسشىسىنىڭ بۇيرىعىمەن ەلوردالىق 5573 اسكەري ءبولىمنىڭ اسكەري قىزمەتشىلەرى قوعامدىق ءتارتىپتى قامتاماسىز ەتۋ بارىسىندا اسكەري بورىشتى ۇلگىلى اتقارعانى، وزدەرىنە جۇكتەلگەن مىندەتتەردى ادال جانە ىجداعاتتىلىقپەن ورىنداعانى ءۇشىن «ۇلتتىق ۇلان ۇلان ۇزدىگى» جانە «قوعامدىق ءتارتىپتى ساقتاعانى ءۇشىن» توسبەلگىلەرىمەن ماراپاتتالدى.
سالتاناتتى راسىمگە قر ءىىم ۇلتتىق ۇلانى باس قولباسشىلىعىنىڭ قولباسشىلىعى مەن جەكە قۇرامى قاتىستى.
قر ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ ەرلىكپەن ەرەكشەلەنگەن جاۋىنگەرلەردى توسبەلگىلەرمەن ماراپاتتادى.
- مەن ۇلتتىق ۇلان باس قولباسشىلىعى جانە جەكە ءوز اتىمنان سىزدەرگە كوزسىز ەرلىكتەرىڭىز ءۇشىن، ال اتا-انالارىڭىزعا قيىن ساتتە ەل قورعاۋعا دايىن وسىنداي ۇلدار تاربيەلەگەنى ءۇشىن ۇلكەن العىسىمدى بىلدىرەمىن. مۇنداي باتىلدىق پەن جاۋاپكەرشىلىك ۇلگىلەرى جەكە قۇرامدى جاۋىنگەرلىك قىزمەتتى ءساتتى ورىنداۋعا شابىتتاندىرادى. سوندىقتان ءبىز اسكەري قىزمەتشىلەرىمىزدىڭ ەڭبەگىن لايىقتى باعالاۋ ءۇشىن قولدان كەلگەننىڭ ءبارىن جاسايمىز، - دەدى گەنەرال-مايور اڭساعان بالتابەكوۆ.
اتاپ ايتقاندا، اسكەري جاساق باستىعى قاتارداعى جاۋىنگەر ناريمان مىرزاحمەتوۆ «ۇلتتىق ۇلان قىزمەتىنىڭ ۇزدىگى» توسبەلگىسىمەن ماراپاتتالدى، ال پاترۋلدىك قاتارداعى جاۋىنگەرلەر دامير مۇقاشەۆ پەن داۆيد كورسۋنوۆقا «قوعامدىق ءتارتىپتى ساقتاعانى ءۇشىن» توسبەلگىلەرى تابىستالدى.
ەسكە سالايىق، وقيعا 2 قازان كۇنى كەشكى ساعات 22:00 شاماسىندا بولعان. ۇلتتىق ۇلاننىڭ اسكەري جاساعىنا جەرگىلىكتى تۇرعىن كومەك سۇراپ كەلىپ، ەسىل وزەنىنە كوپىردەن جاس قىز سەكىرگەنىن ايتقان بولاتىن.
وقيعا ورنىنا دەرەۋ جەتكەن ۇلاندىقتار جەدەل تۇردە قۇتقارۋ جۇمىستارىنا كىرىستى. كاسىبيلىك پەن تاباندىلىق تانىتقان ساربازدار قىزدى سۋدان تەز شىعارىپ الدى جانە جەدەل جاردەم كەلگەنگە دەيىن وعان العاشقى كومەك كورسەتتى. وسىلايشا، قايعىلى جاعدايدى بولدىرمادى.
- مۇنداي ماراپاتتى باس قولباسشىنىڭ قولىنان الۋ مەن ءۇشىن ۇلكەن مارتەبە. مەنىڭ ورنىمدا باسقا ناعىز ەر جىگىت بولسا، ول دا وسىلاي جاسار ەدى. قورقاق بولىپ جۇرگەننەن گورى، حالىق جادىندا باتىر بولىپ ساقتالىپ قالعان ارتىق. بۇل – ءبىزدىڭ وتان الدىنداعى بورىشىمىز! الداعى ۋاقىتتا دا ءبىز ءوز انتىمىزعا ادال بولىپ، ەلىمىزدىڭ يگىلىگى ءۇشىن قىزمەت ەتەتىن بولامىز، – دەپ اتاپ ءوتتى اسكەري جاساق باستىعى قاتارداعى جاۋىنگەر ناريمان مىرزاحمەتوۆ.
بۇعان دەيىن 5573 اسكەري ءبولىمى كومانديرىنىڭ بۇيرىعىمەن قاتارداعى جاۋىنگەر ناريمان مىرزاحمەتوۆكە قىسقا مەرزىمدى 10 كۇندىك قىزمەتتىك دەمالىس بەرىلگەن ەدى. ال قاتارداعى جاۋىنگەر دامير مۇقاشەۆ پەن داۆيد كورسۋنوۆقا گراموتالار مەن كومانديرلىك ساعاتتار تابىستالدى.
ايتا كەتەيىك، ۇلتتىق ۇلاننىڭ ساربازدارى ەلىمىزدىڭ 21 قالاسىندا قوعامدىق ءتارتىپتى قامتاماسىز ەتەدى. سونداي-اق، جاۋىنگەرلىك قىزمەت كەزىندە ولار قۇقىقبۇزۋشىلار مەن قاۋىپتى قىلمىسكەرلەردى ۇستاۋعا، ۇرلانعان زاتتاردى يەلەرىنە قايتارۋعا جانە جوعالعان بالالاردى تابۋعا كومەكتەسەدى.
