رەسەيدىڭ بۇرىنعى قورعانىس ءمينيسترى سەرگەي يۆانوۆ 73 جاسىندا ومىردەن ءوتتى، دەپ حابارلايدى "ادىرنا" ۇلتتىق پورتالى.
ونىڭ قايتىس بولۋ سەبەبى مەن وزگە دە ءمان-جايلارى رەسمي تۇردە جاريالانعان جوق.
سەرگەي يۆانوۆ 1953 جىلدىڭ 31 قاڭتارىندا لەنينگراد قالاسىندا دۇنيەگە كەلگەن. ول لەنينگراد مەملەكەتتىك ۋنيۆەرسيتەتىنىڭ فيلولوگيا فاكۋلتەتىن جانە اسكەري كافەدراسىن تامامداعان. 1975 جىلى كسرو مەملەكەتتىك قاۋىپسىزدىك كوميتەتىندە قىزمەتىن باستاپ، كەيىن كەڭەس وداعى ىدىراعاننان سوڭ رەسەيدىڭ سىرتقى بارلاۋ قىزمەتىندە جۇمىس ىستەدى.
1998 جىلدىڭ تامىزىندا رەسەي فەدەرالدىق قاۋىپسىزدىك قىزمەتى ديرەكتورىنىڭ ورىنباسارى بولىپ تاعايىندالعان يۆانوۆ كەيىن رەسەي قاۋىپسىزدىك كەڭەسىن باسقاردى. ال 2001–2007 جىلدارى رەسەيدىڭ قورعانىس ءمينيسترى قىزمەتىن اتقاردى.
2008 جىلعى پرەزيدەنتتىك سايلاۋ قارساڭىندا ول ۆلاديمير ءپۋتيننىڭ ىقتيمال مۇراگەرلەرىنىڭ ءبىرى رەتىندە اتالعان. الايدا رەسەي پرەزيدەنتى بولىپ دميتري مەدۆەدەۆ سايلانىپ، سەرگەي يۆانوۆ 2009 جىلى پرەمەر-ءمينيستردىڭ ورىنباسارى قىزمەتىنە كىرىستى. بۇل لاۋازىمدا 2011 جىلعا دەيىن جۇمىس ىستەپ، كەيىن رەسەي پرەزيدەنتى اكىمشىلىگىنىڭ باسشىسى بولدى.
2016 جىلدان باستاپ سەرگەي يۆانوۆ رەسەي پرەزيدەنتىنىڭ تابيعاتتى قورعاۋ قىزمەتى، ەكولوگيا جانە كولىك ماسەلەلەرى جونىندەگى ارنايى وكىلى قىزمەتىن اتقاردى. سونىمەن قاتار ول «روستەح» مەملەكەتتىك كورپوراتسياسىنىڭ بايقاۋ كەڭەسىنىڭ قۇرامىنا كىرگەن.
