بىرقاتار باق-تا كارتادان كارتاعا جاسالعان اۋدارىمدارعا 12 پايىزدىق قوسىلعان قۇن سالىعىمەن (كقس) سالىق سالىناتىندىعى تۋرالى اقپارات تارادى. بۇل نورما جاڭا سالىق كودەكسىنىڭ جوباسىندا بار دەپ حابارلانعان. قازاقستاننىڭ ۇلتتىق ەكونوميكا مينيسترلىگى بۇل جاعدايعا قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
ءماجىلىس دەپۋتاتى اسحات ايماعامبەتوۆتىڭ ايتۋىنشا، بۇل اقپارات قاتە. مينيسترلىكتىڭ مالىمدەۋىنشە، بۇل تەك بانكتەردىڭ قىزمەتى ءۇشىن الىناتىن كوميسسيالارعا قاتىستى ماسەلە. مىسالى، اۋدارىمدار نەمەسە كارتا شىعارۋ قىزمەتى ءۇشىن الىناتىن كوميسسيالار.
"ازاماتتاردىڭ اقشاسىنا سالىق سالىنبايدى. بۇرىن بانكتەر قارجىلىق وپەراتسيالار بويىنشا سالىقتىق جەڭىلدىكتەر الىپ، سول تابىستان سالىق تولەمەيتىن. جاڭا سالىق كودەكسىنىڭ جوباسىندا وسى جەڭىلدىكتەردى الىپ تاستاۋ ۇسىنىلىپ وتىر", — دەپ ءتۇسىندىردى مينيسترلىك.
سونداي-اق، ءبىر بانكتىڭ ىشىندەگى اقشا اۋدارىمدارى ادەتتە كوميسسياسىز جۇزەگە اساتىندىعىن اتاپ ءوتتى. سوندىقتان مۇنداي جاعدايلاردا سالىق سالىنبايدى. مىسالى، ەگەر بانك كليەنتتەن 100 تەڭگە كوميسسيا السا، ونىڭ 12 تەڭگەسى قوسىلعان قۇن سالىعى رەتىندە تولەنۋى قاجەت.
جاڭا سالىق كودەكسى 2025 جىلدىڭ شىلدەسىنە دەيىن قابىلدانۋى ءتيىس ەدى. بىراق قازاقستان پرەزيدەنتى قاسىم-جومارت توقاەۆ ونىڭ قابىلدانۋىن كەيىنگە شەگەرۋدى تاپسىردى.
