ەل ىشىندە قالاارالىق كولىك قۇرالى بولعان Alphard-تان قاۋىپ سەيىلمەي تۇر. ۇلكەن جولدا جول-كولىك اپاتى بولىپ، Alphard “اجال كولىگىنە” اينالعان.
كەشە، 17 تامىز كۇنى جامبىل وبلىسىندا جانتۇرشىگەرلىك اپات بولدى.
“2024 جىلعى 17 تامىزدا ساعات 1.00 شاماسىندا «مەركى-شۋ-بۋرىلبايتال» رەسپۋبليكالىق تاس جولىنىڭ 40-شاقىرىمىندا اۋىر جول-كولىك وقيعاسى بولدى. Toyota Alphard كولىگىنىڭ جۇرگىزۋشىسى قارسى جولاققا شىعىپ كەتىپ، پوليتسيا پاترۋلدىك پوليتسياسىنىڭ Skoda Octavia كولىگىمەن سوقتىعىسقان. وقيعا سالدارىنان قىزمەتتىك كولىكتە بولعان جانە جول قاۋىپسىزدىگىن قامتاماسىز ەتىپ، تاس جولدى كۇزەتىپ جۇرگەن ەكى پاترۋلدىك پوليتسەي وقيعا ورنىندا قازا تاپتى. قايتىس بولعان پوليتسەيلەردىڭ ءبىرى 11 بالاسى بار اكە. Toyota Alphard كولىگىندە سەگىز جولاۋشى بولعان. ولاردىڭ تورتەۋى وقيعا ورنىندا كوز جۇمدى، جۇرگىزۋشى مەن قالعان ءۇش جولاۋشى ءارتۇرلى اۋىرلىقتاعى جاراقاتتارمەن ورتالىق اۋداندىق اۋرۋحاناعا جاتقىزىلدى”، - دەپ حابارلادى جامبىل وبلىسى ءىىد ءباسپاسوز قىزمەتى.
“اجال ايتىپ كەلمەيدى” دەسەك تە Alphard اپاتى جۇرگىزۋشىلەردىڭ جول ۇستىندە ۇيىقتاپ كەتۋى، قارسى جولاققا شىعۋى، قاتتى جىلدامدىقپەن جۇرۋىنەن تۋىنداپ وتىر. جىل سايىن بۇل ستاتيستيكا دا ءوسىپ جاتىر. قازتاگ رەداكتسياسىنىڭ مالىمەتىنشە Alphard-پەن بولعان جول-كولىك اپاتى جيىلەگەن.
2020 جىلدىڭ اقپان ايىندا سامارا-شىمكەنت تاس جولىندا Toyota Alphard كولىگى اپاتقا ۇشىراپ، ەكى ادام وقيعا ورنىندا ءتىل تارتپاي كەتكەن. ودان بولەك، تاعى ەكى ادام زارداپ شەكتى.
سول جىلى تامىز ايىندا اقتاۋ-جاڭاوزەن تاس جولىندا دا Toyota Alphard كولىگىنىڭ قاتىسۋىمەن بولعان جول-كولىك وقيعاسىنان ءتورت ادام قازا تاپتى.
2021 جىلدىڭ مامىرىندا جۇكتى ايەلى بار جەدەل جاردەم كولىگى Toyota Alphard كولىگىمەن سوقتىعىسقان.
ال 2022 جىلدىڭ اقپان ايىندا Alphard ورال-اتىراۋ تاس جولىندا اۋدارىلىپ، ءبىر ادام قازا تاپقان. ال ەكىنشىسى اۋرۋحاناعا جاتقىزىلدى.
2022 جىلدىڭ كوكتەمىندە سامارا-شىمكەنت تاس جولىندا Toyota Alphard كولىگىنىڭ قاتىسۋىمەن بولعان جول اپاتىنان جەتى ادام زارداپ شەكتى. ابىروي بولعاندا زارداپ شەككەندەر بولماعان.
ارتىنشا 2022 جىلدىڭ ماۋسىمىندا جەتىسۋ وبلىسىندا Toyota Alphard كولىگىنىڭ قاتىسۋىمەن بولعان جول-كولىك وقيعاسى سالدارىنان ەكى ادام قازا تاۋىپ، سەگىز ادام اۋرۋحاناعا جاتقىزىلدى.
ءبىر ايدان سوڭ اقتوبە وبلىسىنداعى تاس جولدا Toyota Alphard كولىگى باسىپ وزىپ، جول-كولىك وقيعاسى بولدى. سالدارىنان وقيعا ورنىندا 7 ادام قازا تاپتى.
2022 جىلعى قازاندا جامبىل وبلىسىندا Toyota Alphard كولىگى مەن اۆتوبۋستىڭ قاتىسۋىمەن بولعان جول-كولىك وقيعاسى سالدارىنان ءبىر ادام قازا تاۋىپ، ءۇش ادام جاراقات الدى. سول ايدا پاۆلودار وبلىسىندا دا Toyota Alphard كولىگىنىڭ قاتىسۋىمەن جول اپاتى بولىپ، ءبىر زەينەتكەر قايتىس بولدى.
2023 جىلعى اقپاندا باتىس قازاقستان وبلىسىندا تاس جولدىڭ بويىندا Toyota Alphard كولىگىنىڭ قاتىسۋىمەن بولعان جول اپاتىنان ەكى ادام قازا تاپقان. ال سامارا-شىمكەنت تاس جولىندا Toyota Alphard كولىگىنىڭ قاتىسۋىمەن بولعان جول-كولىك وقيعاسى سالدارىنان ەكى ادام قازا تاۋىپ، بەس ادام زارداپ شەكتى.
2023 جىلدىڭ مامىر ايىندا سولتۇستىك قازاقستان وبلىسىندا اپات بولدى. تاس جولدا Toyota Alphard كولىگىنىڭ سوقتىعىسۋى سالدارىنان بەس ادام زارداپ شەكتى، ءبىر ادام قازا تاپتى.
2023 جىلدىڭ ماۋسىمى – قوستاناي وبلىسىندا Toyota Alphard كولىگىنىڭ قاتىسۋىمەن بولعان جول اپاتىنان اكەلى-بالالى ەكى ادام قايتىس بولدى.
2023 جىلدىڭ شىلدەسىندە اپات قوستاناي – سارىكول تاس جولىندا بولدى. Toyota Alphard كولىگىنىڭ قاتىسۋىمەن بولعان جول-كولىك وقيعاسى سالدارىنان ەكى جۇرگىزۋشى قايتىس بولدى;
كوپشىلىك ءۇشىن “اپات جولى” اتانعان سامارا-شىمكەنت تاس جولىندا 2023 جىلدىڭ شىلدە ايىندا Toyota Alphard كولىگىنىڭ قاتىسۋىمەن ءبىر ادام ولىمىنە اكەلگەن اپات بولدى.
2023 جىلدىڭ تامىزى. قاراعاندى-بالقاش تاس جولىندا Toyota Alphard كولىگىنىڭ قاتىسۋىمەن بولعان جول اپاتىنىڭ سالدارىنان 13 ادام زارداپ شەكتى. ەشكىم قازا تاپقان جوق.
2023 جىلعى تامىزدا شىمكەنت – سامارا تاس جولىندا Toyota Alphard كولىگى اۋدارىلىپ قالدى. ال قوستاناي وبلىسىنداعى تاس جولدا Toyota Alphard كولىگىنىڭ سوقتىعىسۋى سالدارىنان جولاۋشى تىرىدەي جانىپ كەتتى.
2023 جىلدىڭ قاراشا ايىندا تاراز قالاسىندا جول بويىندا وتىرعان ەر ادامدى Toyota Alphard قاعىپ كەتتى. ەر ادام قازا تاۋىپ، جۇرگىزۋشى وقيعا ورنىنان قاشىپ كەتكەن.
2023 جىلعى جەلتوقسان – اقتوبە وبلىسىندا Toyota Alphard جۇك كولىگىمەن سوقتىعىسقان جول اپاتىنان ەكى وقۋشى كوز جۇمدى.
2023 جىلعى اقپان - «قازاۆتوجول» كومپانياسىنىڭ قىزمەتكەرى قىزىلوردا وبلىسىندا قىزمەتتىك مىندەتتەرىن اتقارۋ كەزىندە قايتىس بولدى. جول اپاتىنا كىنالى دەپ Toyota Alphard كولىگىن تىزگىندەگەن جۇرگىزۋشى تانىلدى.
ال 2024 جىلدىڭ ماۋسىمى – اقتوبەدە Toyota Alphard كولىگىنىڭ قاتىسۋىمەن بولعان جول-كولىك وقيعاسىنان ءتورت ادام قازا تاۋىپ، بىرەۋى اۋرۋحاناعا جاتقىزىلعان.
Alphard كولىگىنىڭ قاتىسۋىمەن سوڭعى اپات 17 تامىزدا تىركەلدى. سالدارىنان التى ادام اجال قۇشتى. ونىڭ ەكەۋى پوليتسيا قىزمەتكەرلەرى. مارقۇم بولعان ءبىر ەر ادامنىڭ ارتىندا 11 بالاسى قالدى.
اقتوبەدە 7 ماۋسىمدا بولعان Alphard اپاتىنان سوڭ مينيسترلىك مالىمدەمە جاساعان.
«وسى ماقساتتا كۇن سايىن تراسسالاردا شامامەن 1,5 مىڭ پاترۋلدىك پوليتسەي قىزمەت ەتەدى. ەكيپاجدار 50 شاقىرىم سايىن ورنالاستىرىلعان. جۇرگىزۋشىلەر كوبىنەسە جول ەرەجەلەرىن ەلەمەيدى. جىلدامدىق رەجيمىن ساقتامايدى. قارسى جولعا شىعىپ كەتىپ جاتادى. مىسالى 5 ماۋسىمدا اقتوبە وبلىسىندا Toyota Alphard اۆتوكولىگىنىڭ جۇرگىزۋشىسى ءرۋلدى باسقارا الماي، اۋدارىلىپ كەتتى. اپاتقا دەيىن ونى پوليتسيا قىزمەتكەرلەرى توقتاتىپ، جول ەرەجەسىن ساقتاۋ تۋرالى ەسكەرتكەن بولاتىن. وقيعا سالدارىنان ءتورت ادام قازا تاپتى. جۇرگىزۋشىلەردى تاعى دا جولدا ساق بولۋعا شاقىرامىن!»—دەدى ول.
2023 جىلى جىلى قازاقستان اۋماعىندا 15 مىڭنان استام جول-كولىك وقيعاسى تىركەلدى. كولىك اپاتى كەزىندە 5 مىڭ ازامات قازا تاۋىپ، 19 مىڭنان استام ادام جاراقات الدى.
قازاقستاندىقتار ءتۇن ىشىندە جىلدامدىقتى قاتتى اسىرىپ، جول ەرەجەسىن ساقتامايتىن جۇرگىزۋشىلەرگە جازانى قاتاڭداتۋدى سۇرايدى. ال Alphard جۇرگىزۋشىلەرىنىڭ ۇيقىسى كەلىپ، كولىكتى تىزگىندەپ، تاس جولدا قۇيىنداي جۇيتكەيتىنىنە دە نارازى بولىپ، شارا قولدانۋعا شاقىرۋدا.
