«ادىرنا» ءتىلشىسى بۇگىنگى كولىك قىزمەتكەرلەرى كۇنىنە وراي «قازاقستان تەمىر جولى» كومپانياسىنىڭ الماتى بولىمشەسى قاۋىپسىزدىك ءبولىمىنىڭ باس مامانى ءبىرجان قاپىشەۆپەن تىلدەستى.
تەمىرجولشى — تەمىردەي ءتارتىپتى تالاپ ەتەتىن ماماندىق. ەلىمىزدە بۇل سالانى تاڭداپ، ەرەن ەڭبەكتەرىمەن حالىق العاسىن الىپ جۇرگەندەردىڭ قاتارى از ەمەس. سولاردىڭ ءبىرى — 8 عاسىرعا تەڭ عۇمىرىن تەمىرجولعا ارناعان قاپىشەۆتار وتباسى.
تاجىريبەلى ماماننىڭ اكەسى مۇرات قاپىشەۆ تەمىرجولدا 45 جىل تەر توككەن. قازىرگى تاڭدا قاريانىڭ بالالارى دا بۇل سالادا ابىرويمەن قىزمەت ەتىپ كەلەدى.
- اۋلەتىمىزدەن 26 جان تەمىرجولدا ەڭبەك ەتكەن. بالا كۇنىمنەن تەمىرجولدى كورىپ وسكەندىكتەن، بۇل سالاعا كەلۋىم كەزدەيسوق بولعان جوق. اپا-جەزدەلەرىمىز بەن اتا-انامىزدىڭ ماماندىعىنا دەگەن ادالدىعى، شارشاماي كۇندىز-ءتۇنى ەرىنبەي جۇمىس ىستەۋى ءبىزدى دە قىزىقتىراتىن. كىشكەنتايىمىزدا ءبىز دە وسىنداي بولساق قوي دەپ ارمانداپ وستىك. شىنى كەرەك، تەمىرجول سالاسىندا جۇمىس ىستەڭدەر دەپ ەشكىم ەشقاشان ۇگىتتەگەن ەمەس. ءبارىمىز دە ءوز جۇرەك قالاۋىمىزبەن كەلدىك، - دەيدى ءبىرجان مۇراتۇلى.
اكە جولىن جالعاستىرعان ازامات تاڭداعان ماماندىعىنىڭ قيىن ەكەنىن جاسىرمادى.
- 1998 جىلى الماتى تەمىرجول كوللەدجىنە قۇجاتتارىمدى تاپسىرىپ، وقۋعا ءتۇستىم. سودان بەرى وسى سالادا ەڭبەك ەتىپ ءجۇرمىن. 26 جىل ىشىندە تالاي قىزىق پەن شىجىقتى باستان وتكەردىم. بۇل – اۋىر دا، قيىن سالا. دەسە دە، ابىرويمەن اتقارعان جۇمىسىم، حالىقتىڭ العىسى ماعان ەرەكشە ءلاززات سىيلايدى، - دەيدى ول.
ءبىرجان قاپىشەۆ كەز كەلگەن ادامنىڭ تەمىرجولشى بولا المايتىنىن اتاپ ءوتتى.
- ەڭ الدىمەن، ءتوزىم، قايرات جانە سابىر كەرەك. بۇل سالا تەز شەشىم قابىلداي الۋدى دا قاجەت ەتەدى. بولاشاقتا ءدال وسى ماماندىقتى تاڭداعىم كەلەدى دەگەن جاستار مەن اتاپ وتكەن قاسيەتتەردى بويىنا سىڭىرسە، مىقتى مامان بولىپ شىعادى، - دەپ تولىقتىردى ول.
مارتەبەلى ماماندىق يەسى وسى سالاداعى كەمشىلىكتىردى، اسىرەسە، شويىنجولدا شىڭدالعانداردىڭ لايىقتى جالاقى المايتىنىن ايتادى.
- وكىنىشكە قاراي، تەمىرجولشىلاردى دايارلاۋدا قازاقشا عىلىمي كىتاپتار جەتكىلىكسىز. تەرميندەردىڭ كوبى ورىسشا، قازاقشا بالاماسى جوقتىڭ قاسى. سول سەبەپتى وزگە تىلدەگى كىتاپتاردى وقۋعا ءماجبۇرمىز. ايلىق تا تەمىرجولشىلاردىڭ جاساپ جۇرگەن ەڭبەكتەرىنە تاتىمايدى. ماسەلەن، جول جوندەۋشىلەر، پويىز قۇراستىرۋشىلار، ۆاگون قاراۋشىلار، ماشينيستەر قىستىڭ قاقاعان ايازىندا، جازدىڭ اپتاپ ىستىعىندا جۇمىس ىستەيدى. بولاشاقتا جالاقى ماسەلەسىنىڭ جاقسارعانىن قالايمىن. ويتكەنى ەڭبەك باعالانۋى ءتيىس،—دەپ قورىتىندىلادى ءبىرجان مۇراتۇلى.
ديانا اسان
«ادىرنا» ۇلتتىق پورتالى
