«Adyrna» tilshisi búgingi Kólik qyzmetkerleri kúnine oraı «Qazaqstan temir joly» kompanııasynyń Almaty bólimshesi qaýipsizdik bóliminiń bas mamany Birjan Qapyshevpen tildesti.
Temirjolshy — temirdeı tártipti talap etetin mamandyq. Elimizde bul salany tańdap, eren eńbekterimen halyq alǵasyn alyp júrgenderdiń qatary az emes. Solardyń biri — 8 ǵasyrǵa teń ǵumyryn temirjolǵa arnaǵan Qapyshevtar otbasy.
Tájirıbeli mamannyń ákesi Murat Qapyshev temirjolda 45 jyl ter tókken. Qazirgi tańda qarııanyń balalary da bul salada abyroımen qyzmet etip keledi.
- Áýletimizden 26 jan temirjolda eńbek etken. Bala kúnimnen temirjoldy kórip óskendikten, bul salaǵa kelýim kezdeısoq bolǵan joq. Apa-jezdelerimiz ben ata-anamyzdyń mamandyǵyna degen adaldyǵy, sharshamaı kúndiz-túni erinbeı jumys isteýi bizdi de qyzyqtyratyn. Kishkentaıymyzda biz de osyndaı bolsaq qoı dep armandap óstik. Shyny kerek, temirjol salasynda jumys isteńder dep eshkim eshqashan úgittegen emes. Bárimiz de óz júrek qalaýymyzben keldik, - deıdi Birjan Muratuly.
Áke jolyn jalǵastyrǵan azamat tańdaǵan mamandyǵynyń qıyn ekenin jasyrmady.
- 1998 jyly Almaty temirjol kolledjine qujattarymdy tapsyryp, oqýǵa tústim. Sodan beri osy salada eńbek etip júrmin. 26 jyl ishinde talaı qyzyq pen shyjyqty bastan ótkerdim. Bul – aýyr da, qıyn sala. Dese de, abyroımen atqarǵan jumysym, halyqtyń alǵysy maǵan erekshe lázzat syılaıdy, - deıdi ol.
Birjan Qapyshev kez kelgen adamnyń temirjolshy bola almaıtynyn atap ótti.
- Eń aldymen, tózim, qaırat jáne sabyr kerek. Bul sala tez sheshim qabyldaı alýdy da qajet etedi. Bolashaqta dál osy mamandyqty tańdaǵym keledi degen jastar men atap ótken qasıetterdi boıyna sińirse, myqty maman bolyp shyǵady, - dep tolyqtyrdy ol.
Mártebeli mamandyq ıesi osy saladaǵy kemshiliktirdi, ásirese, shoıynjolda shyńdalǵandardyń laıyqty jalaqy almaıtynyn aıtady.
- Ókinishke qaraı, temirjolshylardy daıarlaýda qazaqsha ǵylymı kitaptar jetkiliksiz. Termınderdiń kóbi oryssha, qazaqsha balamasy joqtyń qasy. Sol sebepti ózge tildegi kitaptardy oqýǵa májbúrmiz. Aılyq ta temirjolshylardyń jasap júrgen eńbekterine tatymaıdy. Máselen, jol jóndeýshiler, poıyz qurastyrýshylar, vagon qaraýshylar, mashınıster qystyń qaqaǵan aıazynda, jazdyń aptap ystyǵynda jumys isteıdi. Bolashaqta jalaqy máselesiniń jaqsarǵanyn qalaımyn. Óıtkeni eńbek baǵalanýy tıis,—dep qorytyndylady Birjan Muratuly.
Dıana Asan
«Adyrna» ulttyq portaly
