ماڭعىستاۋ وبلىسىنداعى ماڭعىشلاق ستانتسياسىنان اقتاۋ تەڭىز پورتىنا دەيىنگى ماگيسترالدىق تەمىرجول جەلىسى مەملەكەت مەنشىگىنە قايتارىلادى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
بۇل شەشىمدى ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتى 14 ناۋرىزدا قابىلدادى.
پروكۋراتۋرانىڭ مالىمەتىنشە، «كاسكور-ترانسسەرۆيس» اق اتالعان تەمىرجول جەلىسىن يەلىگىندە زاڭسىز ۇستاپ كەلگەن. قازاقستان زاڭناماسىنا سايكەس، ماگيسترالدىق تەمىرجول جەلىلەرى مەملەكەتتىك مەنشىكتە بولۋى ءتيىس. وسىعان بايلانىستى كولىك مينيسترلىگى سوتقا تالاپ ارىز بەرىپ، ونى تولىق كولەمدە قاناعاتتاندىردى.
«بۇل شەشىم – ەلىمىزدىڭ كولىك ينفراقۇرىلىمىن تۇراقتى دامىتۋ جانە تەمىرجول جۇيەسىنىڭ ستراتەگيالىق نىساندارىن مەملەكەت باقىلاۋىنا الۋ ءۇشىن ماڭىزدى قادام»، – دەپ مالىمدەدى باس كولىك پروكۋراتۋراسى.
اتالعان كومپانيا نۇرتاي ابىقاەۆ پەن جاقسىبەك كۇلەكەەۆكە جاقىن ادامدارعا تيەسىلى. قارجى مينيسترلىگىنىڭ دەرەكتەرىنە سايكەس، كومپانيانىڭ اففيليرلەنگەن تۇلعالارى قاتارىندا 2010 جىلدان بەرى نۇرتاي ابىقاەۆتىڭ ۇلى – مارات ابىقاەۆ بار. ال جاقسىبەك كۇلەكەەۆ 2021 جىلدان بەرى كومپانيانىڭ ديرەكتورلار كەڭەسىنىڭ مۇشەسى.
جاقسىبەك كۇلەكەەۆ – ەۋرازيا ۇلتتىق ۋنيۆەرسيتەتىنىڭ ديرەكتورلار كەڭەسىنىڭ توراعاسى جانە پرەزيدەنت جانىنداعى الەۋمەتتىك-ەكونوميكالىق رەفورمالاردى مونيتورينگتەۋ جانە تالداۋ ورتالىعىنىڭ مۇشەسى. بۇرىن ول جوعارى مەملەكەتتىك قىزمەتتەر اتقارعان.
2008 جىلى «قازاقستان تەمىر جولى» ۇلتتىق كومپانياسىنىڭ پرەزيدەنتى بولعان كەزدە لاۋازىمدىق وكىلەتتىگىن تەرىس پايدالانۋ بويىنشا ايىپتالىپ، ءۇش جىلعا باس بوستاندىعىنان ايىرىلعان. ول مەملەكەتتىك ساتىپ الۋ تەندەرلەرىندە زاڭبۇزۋشىلىقتار جاساعانى، تەمىرجول قۇرىلىسىنا قاجەتتى ماتەريالداردى قىمبات باعاعا ساتىپ العانى جانە قىزمەتتىك كولىك رەتىندە Lexus LX 470 اۆتوكولىگىن جوعارى باعامەن يەلەنگەنى ءۇشىن سوتتالعان.
