الداعى جىلدارى 1300 شاقىرىمنان استام تەمىرجول سالىنادى. بۇل تۋرالى قر پرەمەر-ءمينيسترى ءاليحان سمايىلوۆ «قازاقستان تەمىر جولى» ۇلتتىق كومپانياسىنىڭ قىزمەتى جانە ەلىمىزدىڭ كولىك-ترانزيتتىك الەۋەتىن ودان ءارى دامىتۋ ماسەلەلەرى جونىندە كەڭەس وتكىزدى، دەپ حابارلايدى “Aدىرنا” ۇلتتىق پورتالى..
كولىك ءمينيسترى مارات قاراباەۆتىڭ ايتۋىنشا، بيىلعى 10 ايدا جۇك تاسىمالداۋ كولەمى 246 ملن توننانى قۇرادى، بۇل – وتكەن جىلدىڭ سايكەس كەزەڭىمەن سالىستىرعاندا 3,3%-عا ارتىق. جىل سوڭىنا دەيىن 300 ملن تونناعا جەتكىزۋ جوسپارلانىپ وتىر.
سونداي-اق، الداعى جىلدارى ەلىمىزدىڭ ترانزيتتىك الەۋەتىن ەداۋىر ارتتىراتىن، 1300 شاقىرىمنان استام تەمىرجول سالۋ جوسپارلانعان. اتاپ ايتقاندا، بۇل – دوستىق–مويىنتى، باقتى–اياگوز، داربازا–ماقتاارال جەلىلەرى جانە الماتى ماڭى اينالما جولى.
سونىمەن قاتار قولدانىستاعى تەمىرجولداردى جوندەۋ، جاڭا لوكوموتيۆتەر مەن ۆاگوندار ساتىپ الۋ، ستانسالار مەن ۆوكزال كەشەندەرىن جاڭعىرتۋ جۇمىستارى جۇرگىزىلەتىن بولادى.
پرەمەر-مينيستر «قتج» ۇك» اق وتاندىق تاۋار وندىرۋشىلەر تاراپىنان كەلىپ تۇسكەن بارلىق شاعىمداردى جەدەل تالداپ، كولىك مينيسترلىگىمەن بىرلەسە وتىرىپ، جۇك تاسىمالى كەزىندەگى كەدەرگىلەردى جويۋ جونىندەگى پارمەندى شارالار ازىرلەۋ قاجەتتىگىن اتاپ ءوتتى.
