11 قازان كۇنى استانادا «وتانداستار» فورۋمى وتەدى، دەپ حابارلايدى «ادىرنا» ۇلتتىق پورتالى.
استانا اقشامىنىڭ مالىمەتىنە سايكەس، فورۋمعا تەك ەتنيكالىق قازاقتار عانا ەمەس، قازاقستاندا كىندىك قانى تامعان ازاماتتار مەن ولاردىڭ ۇرپاقتارىن قامتىعان 300-دەن ارتىق قوناق شاقىرىلعان. ولاردىڭ قاتارىندا مەملەكەت قايراتكەرلەرى، دەپۋتاتتار، شەتەلدەگى قازاقتارمەن ءجيى قارىم-قاتىناس ورناتىپ، ولاردىڭ تالاپ-تىلەكتەرىن بيلىككە جەتكىزۋگە كۇش سالىپ جۇرگەن ازاماتتار، شەتەلدەن كوشىپ كەلگەن اقىن-جازۋشى، عالىمدار، ساياسات، مادەنيەت، عىلىم، ءبىلىم، مەديا، بيزنەس سالاسىنىڭ وكىلدەرى بار.
اتالعان فورۋمنىڭ ماقساتى – شەتەلدەگى قازاق ۇيىمدارىمەن ىنتىماقتاستىقتى تالقىلاۋ; ەلىمىزدىڭ جاڭا كەزەڭدەگى مەملەكەتتىك ساياسات پەن ساياسي-ەكونوميكالىق رەفورمالارىمەن، سونداي-اق ۇلتتىق رۋحانياتقا قاتىستى زاماناۋي ترەندتەرمەن تانىستىرۋ; شەتەلدەگى قازاقتاردى قولداۋدا قازاقستاننىڭ جۇرگىزىپ وتىرعان ساياساتى; شەتەلدەگى قازاق جاستارىنا قازاقستاندا ساپالى ءبىلىم الۋدا جانە ءوز قابىلەتتەرىن ىسكە اسىرۋدا، سونداي-اق ەلگە كوشىپ كەلەتىن قانداستارعا مەملەكەت تاراپىنان قابىلدانىپ جاتقان قولداۋ شارالارى تۋرالى اقپاراتتاندىرۋ.
استانادا وتەتىن بۇل فورۋمدا شەت ەلدەردەگى قانداستارعا كرەاتيۆتىك يندۋستريا، مەديا، مادەنيەت، كاسىپكەرلىك سالالارىنداعى تىڭ ترەندتەر، ەلىمىزدىڭ ينۆەستيتسيالىق احۋالى مەن سونى باستامالارى تانىستىرىلماق. شەت ەلدەردەگى قازاق ۇيىمدارىنىڭ باسشىلارى مەن وتاندىق ءتۇرلى سالا وكىلدەرىنە ءبىر-بىرىمەن بايلانىس ورناتۋىنا، تاجىريبە الماسۋىنا جاعداي جاسالماق. سونىمەن قاتار «وتانداستار قورى» كە اق جاڭا جوبالارىنىڭ تۇساۋكەسەرى ءوتىپ، «ۇلى دالا» جوباسى اياسىندا 11 كىتاپتىڭ تۇساۋكەسەر ءراسىمىن وتكىزۋ شارالارى جوسپارلانىپ وتىر.
سونداي-اق قازاقستاننان بولەك، بيىل«وتانداستار قورى» شەتەلدە بىرنەشە شارا وتكىزگەن. ونىڭ ىشىندە گەرمانيانىڭ كيولن قالاسىندا ەۋروپا قازاقتارىنىڭ كىشى قۇرىلتايى وتكەن. بۇل قۇرىلتايعا قازاقستاننان قولونەر شەبەرلەرى، ۇلتتىق سپورت ۇيىمدارىنىڭ وكىلدەرى بارعان. ماۋسىم ايىندا رەسەيدىڭ ماسكەۋ قالاسىندا رەسەي قازاق ۇيىمدارى بەلسەندىلەرىنىڭ باسقوسۋى وتسە، شىلدە ايىندا موڭعوليادا كىشى قۇرىلتاي بولعان. الداعى ۋاقىتتا قىتايدا شىعارماشىلىق فورماتتا ءىس-شارالار وتكىزۋ جوسپارلانۋدا.
وسى تۇستا «وتانداستار قورى» كە اق پرەزيدەنتى ابزال ساپاربەكۇلى قور جۇمىسىن جەتىلدىرۋ جولىندا اتقارۋ كەرەك جۇمىستاردى اتاپ ءوتتى.
«ەلىمىزدىڭ كەيبىر زاڭدارىندا شەتەلدەگى قازاقتاردى قولداۋ بويىنشا بىرقاتار باپتار، تارماقتار ەنگىزىلگەن. بىراق شەتەلدەگى قازاقتارمەن بولعان بايلانىستى بىرىزدەندىرۋ ءۇشىن شەتەلدەگى قازاق دياسپورالارىنا قاتىستى ارناۋلى زاڭ نەمەسە قۇجات قابىلداۋ كەرەك. بۇل ماسەلە دە مەملەكەتتىڭ نازارىندا، الداعى ۋاقىتتا شەشىمىن تاپسا، ءبىزدىڭ شەتەل قازاقتارىمەن جۇمىس جاساۋىمىزعا اسا ءتيىمدى بولار ەدى. وسىدان بۇرىن ۇكىمەتتىڭ ەتنيكالىق قازاقتاردى قولداۋعا بايلانىستى ءىس-شارالار جوسپارى قابىلدانعان بولاتىن، ونىڭ 2022 جىلى مەرزىمى ءبىتتى. قازىرگى تاڭدا جاڭا ءىس-شارالار جوسپارى قاراستىرىلۋ ۇستىندە، بيىل جىل سوڭىنا دەيىن قابىلدانادى دەگەن ويدامىز»، - دەيدى قور پرەزيدەنتى.
«ادىرنا» ۇلتتىق پورتالى
