قاراعاندى وبلىسىندا كولىك ينفراقۇرىلىمىن دامىتۋ جۇمىستارى جالعاسۋدا. 2026 جىلى وڭىردە رەسپۋبليكالىق جانە وبلىستىق ماڭىزى بار اۆتوجولداردىڭ، سونداي-اق قالالىق كوشەلەر مەن كوپىرلەردىڭ 500 شاقىرىمعا جۋىعىن جاڭارتۋ جوسپارلانىپ وتىر. جوبالاردىڭ نەگىزگى ماقساتى – جول قوزعالىسى قاۋىپسىزدىگىن ارتتىرۋ جانە وبلىستىڭ لوگيستيكالىق الەۋەتىن دامىتۋ.
نەگىزگى جوبالاردىڭ ءبىرى قاراعاندى – جەزقازعان اۆتوجولىن قايتا جاڭعىرتۋ بولادى. ۇزىندىعى 122 شاقىرىم بولاتىن بۇل ماگيسترال ەلدىڭ ورتالىق وڭىرلەرى ءۇشىن ستراتەگيالىق ماڭىزعا يە جانە قاراعاندى وبلىسىن ۇلىتاۋ وڭىرىمەن بايلانىستىرادى. جول 1970-جىلدارى سالىنعان جانە جارتى عاسىردان استام ۋاقىت بويى كۇردەلى جوندەۋدەن وتپەگەن.
جوبا اياسىندا اۆتوجولدى ءتورت جولاققا دەيىن كەڭەيتۋ قاراستىرىلعان. جۇمىستار جاڭا تاسىلمەن ۇيىمداستىرىلادى: الدىمەن ەكى قوسىمشا جولاق سالىنىپ، سودان كەيىن قولدانىستاعى جول توسەمىنە جوندەۋ جۇرگىزىلەدى. بۇل ءتاسىل كولىك قوزعالىسىن توقتاتپاي، اينالما جولداردى ۇيىمداستىرماي جۇرگىزۋگە جانە جۇرگىزۋشىلەر ءۇشىن قولايسىزدىقتاردى بارىنشا ازايتۋعا مۇمكىندىك بەرەدى.
جوبانى قارجىلاندىرۋ حالىقارالىق قايتا قۇرۋ جانە دامۋ بانكى مەن ازيا ينفراقۇرىلىمدىق ينۆەستيتسيالار بانكى قارىزدارى ەسەبىنەن ماقۇلدانعان. قازىرگى ۋاقىتتا مەردىگەر ۇيىمدى انىقتاۋ بويىنشا كونكۋرستىق راسىمدەر جۇرگىزىلۋدە. اۆتوجولدى قايتا جاڭعىرتۋ جۇمىستارى بيىل باستالىپ، 2029 جىلعا دەيىن اياقتالادى دەپ جوسپارلانعان.
سونىمەن قاتار وبلىستىق ماڭىزى بار اۆتوجولداردىڭ 84 شاقىرىمىنا ورتاشا جوندەۋ جۇرگىزۋ كوزدەلىپ وتىر. اتاپ ايتقاندا، قارقارالى – ەگىندىبۇلاق – بۇركىتتى اۆتوجولى جوندەلەدى.
وڭىردە تەمىرجول ينفراقۇرىلىمىن جاڭعىرتۋ جۇمىستارى دا جۇرگىزىلۋدە.
جوبا «قازاقستان تەمىر جولى» باعدارلاماسى اياسىندا ىسكە اسىرىلىپ، وبلىستا 14 نىساندى قامتيدى: 10 ۆوكزال جانە 4 جولاۋشىلار پلاتفورماسى. جوبا شەڭبەرىندە عيماراتتاردى، ينجەنەرلىك جەلىلەردى، كۇتۋ زالدارىن جانە پەررونداردى جاڭارتۋ، سونداي-اق جولاۋشىلارعا، ونىڭ ىشىندە مۇمكىندىگى شەكتەۋلى ازاماتتارعا قولايلى جاعداي جاساۋ قاراستىرىلعان. قاۋىپسىزدىك، ناۆيگاتسيا جانە جايلىلىق ماسەلەلەرىنە ەرەكشە نازار اۋدارىلادى.
وتكەن جىلدىڭ سوڭىندا ايسا، تەمىرتاۋ (الەۋمەتتىك قالا), سارىشاعان جانە قاراعاندى-سۇرىپتاۋ (جۇپ) ستانتسيالارىنداعى جولاۋشىلار پلاتفورمالارىن جوندەۋ جۇمىستارى اياقتالدى. بيىل بۇل نىسانداردا شاتىرلار مەن ايالداما پاۆيلوندارى ورناتىلادى. سونىمەن قاتار بالقاش-2, مويىنتى، اعادىر، ءداريا، جارىق، جاڭا قاراعاندى، قاراعاندى-سۇرىپتاۋ (جۇپ), مىرزا، نۇرا جانە سارىبەل ۆوكزالدارىنىڭ عيماراتتارىن جاڭارتۋ جۇمىستارى جالعاسۋدا. جوبالاردى بيىل اياقتاۋ جوسپارلانعان.
تاعى ءبىر ماڭىزدى ينفراقۇرىلىمدىق جوبا ازاماتتىق اۆياتسيانى دامىتۋعا قاتىستى. بالقاش قالاسىندا اۋەجايدى قايتا جاڭعىرتۋ جۇمىستارى اياقتالدى. ونىڭ اياسىندا اەرودروم ينفراقۇرىلىمى جاڭارتىلىپ، جابدىقتار مودەرنيزاتسيالاندى. 1 ماۋسىمنان باستاپ استانا مەن الماتى باعىتتارىنا سۋبسيديالاناتىن اۋە رەيستەرىن ىسكە قوسۋ جوسپارلانىپ وتىر. جالپى، اۋەجايدىڭ مۇمكىندىگى ارتىپ، كوبىرەك رەيس قابىلداۋعا جاعداي جاسالادى. بۇل ءوز كەزەگىندە بالقاش كولىنىڭ جاعالاۋىندا تۋريزم مەن ىسكەرلىك بەلسەندىلىكتىڭ دامۋىنا ىقپال ەتەدى.
