تۇركىستان وبلىسىنىڭ دەزينفەكتسيالىق ورتالىعىنىڭ باس ديرەكتورى سىبايلاس جەمقورلىققا قاتىسى بار دەگەن كۇدىكپەن ۇستالدى، دەپ حابارلايدى “ادىرنا” ۇلتتىق پورتالى انتيكور-عا سىلتەپ.
«سوتتىڭ ۇكىمى بويىنشا تورەگەلديەۆ 3 جىلعا باس بوستاندىعىنان ايىرىلدى، ال وزىقباەۆ 7,5 ميلليون تەڭگە كولەمىندە ايىپپۇل تولەۋ جازاسىنا كەسىلدى»، - دەلىنگەن حابارلامادا.
شىمكەنت قالاسىنىڭ قىلمىستىق ىستەر جونىندەگى اۋدانارالىق سوتى «تۇركىستان وبلىسى بويىنشا دەزينفەكتسيالاۋ ورتالىعى» رمك پۆح فيليالىنىڭ باس ديرەكتورى تورەگەلديەۆ ق. مەن جەكە سەرىكتەستىك باسشىسى وزىقباەۆا د.-عا قاتىستى ۇكىم شىعاردى.
تورەگەلديەۆ الاياقتىق، پارا بەرۋگە يتەرمەلەۋ جانە نەمقۇرايلىلىق جاساعانى ءۇشىن، ال وزىقباەۆ پارا الۋعا ارەكەتتەنگەنى ءۇشىن كىنالى دەپ تانىلعان.
«تورەگەلديەۆتىڭ رمك-دا جۇرگىزىلىپ جاتقان تەكسەرۋ ماسەلەسىن وڭ شەشۋ ءۇشىن لاۋازىمدى تۇلعالارعا پارا بەردى دەگەن جەلەۋمەن وزىقباەۆتىڭ 500 مىڭ تەڭگە كولەمىندەگى قاراجاتىن الاياقتىق جولمەن يەمدەنگەنى انىقتالدى»، - دەلىنگەن حابارلامادا.
سونداي-اق، تورەگەلديەۆتىڭ قىزمەتتىك مىندەتتەرىن تيىسىنشە ورىنداماۋىنىڭ سالدارىنان ورىندالعان جۇمىستار تۋرالى اكتىلەرگە ءىس جۇزىندە ورىنداماي قول قويىپ، مەملەكەتكە 2,2 ميلليون تەڭگە زالال كەلتىرگەنى حابارلاندى.
سونىمەن بىرگە، اتالعان تۇلعالار مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلاتىنى اتاپ وتىلگەن.
ۇكىم زاڭدى كۇشىنە ەنگەن جوق.
