شىمكەنتتىك ەر ادام مۇگەدەكتەردى ماجبۇرلەپ قايىر سۇراتقان، دەپ حابارلايدى “ادىرنا” ۇلتتىق پورتالى كتك-عا سىلتەپ.
35 جاستاعى ەر ادامدى تۇركىستان وبلىسىنىڭ ۇيىمداسقان قىلمىسقا قارسى كۇرەس باسقارماسىنىڭ وكىلدەرى ۇزاق ۋاقىت اڭدىعان.
ول قوس بىردەي اياعىنان ايىرىلعان، ارباعا تاڭىلعان ەگدە جاستاعى ەر ادام مەن دەنساۋلىعى ناشار تاعى ءبىر ازاماتتى ەكى جىل بويى ايماقتىڭ ءار تۇكپىرىنە اپارىپ، كوشەدە قول جايعىزىپ، قايىر سۇراتقان.
كوپتىڭ بەرگەن اقشاسىن ءوز قالتاسىنا باسىپ وتىرعان.
ەڭ سوراقىسى، ول ەكى جىلدان سوڭ قوس قايىرشىنى وزگە بىرەۋگە ساتپاق بولعان. ساتىپ الۋشى رەتىندە حابارلاسقان جەدەل ۋاكىلدەن ەكى مۇگەدەككە 400 مىڭ تەڭگە سۇراعانى انىقتالدى. وسى سومانى الۋ ۇستىندە 35 جاستاعى كۇدىكتى ۇستالىپ اباقتىعا قامالدى. قازىر ىسكە قاتىسى بار دەگەن 10 ادام تەرگەلىپ جاتىر.
“سونىمەن قاتار تاعى 10 ازاماتتىڭ ادام ساۋداسىمەن اينالىسۋ قاتىستىلىعىنا تەكسەرۋ جۇرگىزىلۋدە. ادام ساۋداسى فاكتىسى بويىنشا تەرگەپ-تەكسەرۋ ءجۇرىپ جاتىر. وزگە دە اقپارات قىلمىستىق پروتسەسسۋالدىق كودەكستىڭ 201-بابىنا ساي، جاريا ەتىلمەيدى”، - دەيدى تۇركىستان وبلىسى پروكۋراتۋراسىنىڭ باسقارما پروكۋرورى ولجاس مارين.
