الماتىداعى الاتاۋ اۋدانىندا اتىس شىعارىپ، پوليتسەيگە وق جاۋدىرعان قىلمىسكەردىڭ جۇبايى انايدا دەميرچيان ۇندەۋ جاسادى، - دەپ حابارلايدى “ادىرنا” ۇلتتىق پورتالى.
Tengrinews.kz سايتىنىڭ جازۋىنشا، انايدا دەميرچيان بۇل ۋشىققان جاعداي باقىلاۋدان شىعىپ كەتكەنىن ايتىپ جانى شىعىپ وتىر.
"مەن ول كەزدە ۇيدە بالالارمەن بولعانمىن. جەدەل جاردەم شاقىردىق. ءبارى قالاي بولعانىن بىلمەيمىن. مەن كورگەن جوقپىن. تەك اتىستىڭ داۋسىن ەستىدىم. بىراق سول كەزدە پروكۋراتۋرا، كەزەكشى كەلگەندە ول زاڭ جۇزىندە ءبارىن تۇسىندىرگەندە قىلمىستىڭ الدىن الار ەدى، تۇسىنەسىزدەر مە؟ ادامدار زارداپ شەكتى. كۇيەۋىم، وتباسىم زارداپ شەكتى. ەندى نە بولارىن بىلمەيمىن. ءبىز زاڭعا باعىناتىن ازاماتتار ەكەنىمىزدى، پرەزيدەنتكە ميلليون رەت ۇندەۋ جاساعانىمدى بۇكىل الەم ءبىلسىن. قازىر دە ۇندەۋ جاسايمىن. قۇرمەتتى، پرەزيدەنت مىرزا! ءسىز كونستيتۋتسيا كەپىلىسىز، مەنىڭ كامەلەتكە تولماعان بالالارىمدى قورعاڭىز. كىشكەنتاي بالامنىڭ جۇرەگى اۋىرادى، كەشە ۇستاماسى ۇستاپ قالدى. ال سوت ورىنداۋشىسىنا ءبارىبىر، ول جەدەل جاردەم دە شاقىرمادى. ءبىزدىڭ قىزمەتكەرلەردىڭ جەمقورلىق پەن زاڭسىز ارەكەتتەرى تۋرالى مەملەكەت تە، پرەزيدەنت، ءسىز دە جاقسى بىلەسىز", - دەيدى انايدا دەميرچيان.