فوتو:gov.kz
تۇركىستان وبلىستىق كلينيكالىق اۋرۋحاناسىنىڭ بازاسىندا پروفەسسور، اكادەميك بايماحانوۆتىڭ جەتەكشىلىگىمەن جانە ا.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ جوعارى بىلىكتى ماماندارىنىڭ قاتىسۋىمەن ايماقتاعى ەكىنشى باۋىر ترانسپلانتاتسياسى ءساتتى جۇزەگە استى، دەپ حابارلايدى "ادىرنا".
بۇل – تۇركىستان وبلىسىندا جاسالعان ەكىنشى باۋىر ترانسپلانتاتسياسى.
اقپاراتقا سايكەس، 54 جاستاعى ناۋقاستا باۋىر تسيرروزى، بىرىنشىلىك بيليارلىق حولانگيت باۋىر-جاسۋشالىق جەتكىلىكسىزدىك، پارەنحيماتوزدى سارعايۋ، وڭەش تامىرلارىنىڭ ۆاريكوزدى باۋىر ەنتسەفالوپاتياسى بولعان.
ناۋقاس بىرنەشە جىلدان بەرى گاستروەنتەرولوگتىڭ «د» ەسەبىندە تۇرعان. اۋرۋى استسيتپەن، پورتالدى گيپەرتەنزيامەن جانە سپلەنومەگاليامەن اسقىنعان. ۇزاق ەمدەۋ شارالارىنا قاراماستان، جاعدايىنىڭ ۇدەي تۇسۋىنە بايلانىستى باۋىر ترانسپلانتاتسياسى ءومىرىن ساقتاپ قالۋدىڭ جالعىز جولى بولدى.
دونور رەتىندە ناۋقاستىڭ 24 جاستاعى ۇلى ءوز ەركىمەن دونور بولۋعا كەلىسىم بەرىپ، تولىق مەديتسينالىق تەكسەرۋدەن ءوتتى. ابسوليۋتتىك قارسى كورسەتىلىمدەر انىقتالعان جوق.
قازىرگى ۋاقىتتا ناۋقاس دارىگەرلەردىڭ ديناميكالىق باقىلاۋىندا. وتادان كەيىنگى كەزەڭ اسقىنۋسىز ءوتىپ جاتىر، ترانسپلانتاتسيالانعان باۋىردىڭ قىزمەتى بىرتىندەپ تۇراقتالىپ كەلەدى.
