تۇركىستاندىق دامير ايۋپوۆ شەتەلدىڭ 45 ۋنيۆەرسيتەتىنەن شاقىرتۋ الدى. بۇل تۋرالى وبلىس اكىمىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
№ 15 جالپى ورتا مەكتەبىنىڭ وقۋشىسى اقش، شۆەيتساريا، گەرمانيا، يسپانيا، مالايزيا، شوتلانديا مەملەكەتتەرىندەگى قالاعان جوعارى وقۋ ورنىنىڭ ستۋدەنتى اتانا الادى.
جاس تۇلەك ۇلتتىق بىرىڭعاي تەستىلەۋدەن 133 بالل جيناعان. تالاپكەر تەستىلەۋدى ءبىلىمىن تەكسەرۋ ءۇشىن عانا تاپسىرعانىن ايتادى.
– اۋەلى چەحياعا وقۋعا تۇسكەن دوسىمنىڭ جەتىستىگىنە قىزىعۋشىلىقتان باستالدى. ءبىلىم الۋدى باسقا ەلدە جالعاستىرۋ ءۇشىن ءبىرىنشى كەزەكتە اعىلشىن ءتىلىن ۇيرەنۋ كەرەگىن ەستىگەن بويدا دايىندىق توبىنا جازىلدىم. ءسويتىپ 10-سىنىپتىڭ جارتىسىنان باستاپ شەت ءتىلىن تەرەڭدەتىپ وتەتىن كۋرستا ساباق الدىم. جارتى جىلدىڭ ىشىندە IELTS-تاعى دەڭگەيىم 6,5-عا جەتتى. نەگىزىنەن، مەكتەپتە گەوگرافيا، ماتەماتيكا جانە اعىلشىن ءتىلىن ءسۇيىپ وقىدىم. ءسويتىپ، IT سالاسىن تاڭدايمىن دەپ جۇرگەنمىن. بىراق 11-سىنىپتا بۇل ويىم وزگەردى. رەستوران باسقارۋدى ارمانداي باستادىم. ءسويتىپ گەوگرافيا مەن اعىلشىن ءتىلى پاندەرىنە دەن قويدىم. وعان ەش وكىنبەيمىن. قازىر شەتەلدىڭ 45 جوعارى وقۋ ورنىنا شاقىرتۋ الدىم، – دەيدى ول.
داميردىڭ ايتۋىنشا، ونى شاكىرتاقىسى 2,5 ملن تەڭگە بولاتىن ۋنيۆەرسيتەتتەر دە شاقىرعان. بىراق جۇرەك قالاۋى ەۋروپاعا ءتۇسىپ تۇر. سىنىپتاستارىنىڭ اراسىندا شەتەلگە وقۋعا تۇسكەن جالعىز ءوزى عانا ەمەس، ولاردىڭ قاتارىندا كورەيا، اقش پەن سلوۆاكيادا وقۋعا جولداما العاندارى دا بار.
