Túrkistandyq Damır Aıýpov sheteldiń 45 ýnıversıtetinen shaqyrtý aldy. Bul týraly oblys ákiminiń baspasóz qyzmeti jazdy, dep habarlaıdy «Adyrna» tilshisi.
№ 15 jalpy orta mektebiniń oqýshysy AQSh, Shveıarııa, Germanııa, Ispanııa, Malaızııa, Shotlandııa memleketterindegi qalaǵan joǵary oqý ornynyń stýdenti atana alady.
Jas túlek ulttyq biryńǵaı testileýden 133 ball jınaǵan. Talapker testileýdi bilimin tekserý úshin ǵana tapsyrǵanyn aıtady.
– Áýeli Chehııaǵa oqýǵa túsken dosymnyń jetistigine qyzyǵýshylyqtan bastaldy. Bilim alýdy basqa elde jalǵastyrý úshin birinshi kezekte aǵylshyn tilin úırený keregin estigen boıda daıyndyq tobyna jazyldym. Sóıtip 10-synyptyń jartysynan bastap shet tilin tereńdetip ótetin kýrsta sabaq aldym. Jarty jyldyń ishinde IELTS-taǵy deńgeıim 6,5-ǵa jetti. Negizinen, mektepte geografııa, matematıka jáne aǵylshyn tilin súıip oqydym. Sóıtip, IT salasyn tańdaımyn dep júrgenmin. Biraq 11-synypta bul oıym ózgerdi. Restoran basqarýdy armandaı bastadym. Sóıtip geografııa men aǵylshyn tili pánderine den qoıdym. Oǵan esh ókinbeımin. Qazir sheteldiń 45 joǵary oqý ornyna shaqyrtý aldym, – deıdi ol.
Damırdyń aıtýynsha, ony shákirtaqysy 2,5 mln teńge bolatyn ýnıversıtetter de shaqyrǵan. Biraq júrek qalaýy Eýropaǵa túsip tur. Synyptastarynyń arasynda shetelge oqýǵa túsken jalǵyz ózi ǵana emes, olardyń qatarynda Koreıa, AQSh pen Slovakııada oqýǵa joldama alǵandary da bar.
