بيىل ەلدە 181 مىڭنان استام تالاپكەر ۇبت تاپسىردى. ولاردىڭ ىشىندە 78 219 وقۋشى تەگىن جوعارى ءبىلىم الۋ مۇمكىندىگىنە يە بولماق. ال بۇل تىزىمگە ىلىگە الماي قالعاندار اقىلى نەگىزدە وقۋعا ءماجبۇر. وسى ورايدا «ادىرنا» ءتىلشىسى قازاقستاندىق تانىمال جوو-لارداعى ءبىلىم الۋ قۇنىن انىقتادى.
كيمەپ ۋنيۆەرسيتەتى
الماتى قالاسىندا ورنالاسقان كيمەپ (قازاقستان مەنەدجمەنت، ەكونوميكا جانە بولجاۋ ينستيتۋتى ۋنيۆەرسيتەتى) 1992 جىلى تۇڭعىش پرەزيدەنت نۇرسۇلتان نازارباەۆتىڭ جارلىعىمەن قۇرىلعان. ءبىلىم ورداسىندا 1 كرەديت قۇنى 126 710 تەڭگەدەن باستالادى. باكالاۆرياتتى اياقتاۋ ءۇشىن ستۋدەنت ورتا ەسەپپەن 48 ءپاندى وقۋى كەرەك. بۇل 146 اكادەميالىق كرەديتتى قۇرايدى.
دەمەك، كيمەپ-تە 1 جىل ءبىلىم الۋ 6 000 000 تەڭگەدەن باستالادى. ۋنيۆەرسيتەت ىسكەرلىك باسقارۋ، ەكونوميكا، حالىقارالىق قاتىناستار، حالىقارالىق قۇقىق جانە شەت تىلدەرى سالاسىندا تانىمال.
نازارباەۆ ۋنيۆەرسيتەتى
Nazarbayev University – اعىلشىنتىلدى زەرتتەۋ ۋنيۆەرسيتەتى. ول 2024 جىلعى Times Higher Education Asia University Rankings تىزىمىندە 739 جوعارى وقۋ ورنىنىڭ اراسىندا 129 ورىنعا تابان تىرەدى.
ۋنيۆەرسيتەت الدىنداعى دايارلىق، باكالاۆريات جانە ماگيستراتۋرا باعدارلامالارى بويىنشا ءبىلىم الۋشىلار ءبىر وقۋ جىلى ءۇشىن 5 724 000 تەڭگەدەن 7 632 000 تەڭگەگە دەيىن تولەيدى.
ءتورت جىلدىق باكالاۆريات كەزەڭى ءۇشىن ستۋدەنتتەر كەم دەگەندە 22 ميلليون تەڭگە جۇمسايدى. ال مەديتسينا مەكتەبىنىڭ جوعارى وقۋ ورنىنان كەيىنگى وقۋ باعدارلامالارى بويىنشا وقۋ قۇنى ءبىر وقۋ جىلى ءۇشىن 5 342 000 تەڭگەدەن 14 310 000 تەڭگەگە دەيىن بارادى.
قازاقستان-بريتان تەحنيكالىق ۋنيۆەرسيتەتى
قبتۋ – ەلىمىزدەگى جەتەكشى تەحنيكالىق ۋنيۆەرسيتەتتەردىڭ ءبىرى. جالپى شتاتتىق وقىتۋشىلار قۇرامىنىڭ 30%-ى ۇلىبريتانيا، گەرمانيا، اقش، كانادا، ۆەنگريا، كورەيا سىندى مەملەكەتتەردىڭ وكىلدەرىنەن قۇرالعان.
ءبىلىم ورداسىنداعى 1 كرەديت قۇنى - 35 000 - 40 000 تەڭگە. ال وقۋ اقىسى 2,1-2,4 ميلليون تەڭگەنى قۇرايدى.
نارحوز ۋنيۆەرسيتەتى
نارحوز (حالىق شارۋاشىلىعى) – ەكونوميكا، بيزنەس، اقپاراتتىق تەحنولوگيالار، قارجى جانە قۇقىق سالاسىندا وقىتۋدى جۇزەگە اسىراتىن قازاقستانداعى ۋنيۆەرسيتەت. جوعارى وقۋ ورنىندا 1 كرەديت قۇنى 23 000 تەڭگەدەن باستالىپ، 38 700 تەڭگەگە دەيىن بارادى. بىلىمگەر ءبىر جىل ىشىندە شامامەن 62-70 كرەديت وقۋى ءتيىس.
ياعني، نارحوز ستۋدەنتتەرى ءبىر جىلدا كەم دەگەندە 1 426 000 تەڭگە تولەيدى.
ءال-فارابي اتىنداعى قازاق ۇلتتىق ۋنيۆەرسيتەتى
قازۇۋ – ەلىمىزدەگى كوپسالالى جوعارى وقۋ ورىندارى ساناتىنداعى ەڭ ۇزدىك ۋنيۆەرسيتەت. 90 جىلدىق تاريحي بار جوعارى وقۋ ورنىندا قازاق جانە ورىس تىلدەرىندە ءبىلىم الۋ 1 500 000 تەڭگەدەن باستالادى.
ال اعىلشىن ءبولىمىنىڭ ستۋدەنتى اتانعىڭىز كەلسە، 1 700 000 - 2 700 000 تەڭگە كولەمىندە اقشا دايىنداپ قويۋىڭىز قاجەت. ۋنيۆەرسيتەتتە ەكى مىڭنان استام جوعارى بىلىكتى وقىتۋشى جۇمىس ىستەيدى، سونىڭ ىشىندە 1000-نان استام عىلىم دوكتورى مەن كانديداتى بار.
م.نارىكباەۆ اتىنداعى قازگيۋ
ماقسۇت نارىكباەۆ اتىنداعى قازگيۋ (قازاق گۋمانيتارلىق زاڭ ۋنيۆەرسيتەتى) – 1994 جىلى قۇرىلعان جەكە جوعارى وقۋ ورنى. ۋنيۆەرسيتەتتە 4 مەكتەپ – جوعارى گۋمانيتارلىق عىلىمدار مەكتەبى، جوعارى قۇقىق مەكتەبى، حالىقارالىق ەكونوميكا مەكتەبى مەن بيزنەس مەكتەبى بار.
ايتا كەتەيىك، ءبىلىم ورداسىندا ءبىر جىلدىق وقۋ اقىسى 1,5 ميلليون تەڭگەدەن باستالىپ، 1,770 ميلليون تەڭگەگە جەتەدى. ال ءبىر كرەديتت قۇنى 26 500 تەڭگەدەن 29 500 تەڭگەگە دەيىن بارادى.
س. اسفەندياروۆ اتىنداعى قازۇمۋ
سانجار اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى — وقۋ، ەمدەۋ جانە عىلىمي-زەرتتەۋ جۇمىستارىن بىرىكتىرەتىن مەديتسينالىق ءبىلىمنىڭ فلاگمانى. جوو-دا مەديتسينا ماماندىقتارىنىڭ وقۋ اقىسى 1 ملن تەڭگەدەن جوعارى. اتاپ ايتساق، «مەديتسينا»، «جالپى مەديتسينا»، «پەدياتريا»، «فارماتسيا»، «مەديتسينالىق-پروفيلاكتيكالىق ءىس»، «مەيىربيكە ءىسى»ماماندىقتارىندا اقىلى وقۋ 1 250 000 تەڭگەدەن باستالىپ، 1 900 000 تەڭگەگە دەيىن بارادى.
ءبىلىم ورداسىنداعى ەڭ قىمبات ماماندىق — ستاموتولوگيا. ءبىر جىلدىق وقۋ قۇنى 2 100 000 تەڭگەنى قۇرايدى.
ە. گۋميلەۆ اتىنداعى ەۇۋ
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى – قازاقستاننىڭ جەتەكشى كلاسسيكالىق جوعارى وقۋ ورىندارىنىڭ ءبىرى. ۋنيۆەرسيتەت قۇرامىنا 13 فاكۋلتەت كىرەدى. سونداي-اق ەكى اسكەري-وقۋ ماماندىعى بويىنشا زاپاستاعى وفيتسەرلەردى دايىندايتىن اسكەري كافەدرا جۇمىس ىستەيدى.
جوو-دا پەداگوگيكالىق ماماندىقتاردى اقىلى نەگىزدە وقۋ 1 140 000 تەڭگەنى قۇرايدى. ال ونەر جانە گۋمانيتارلىق عىلىمدار، اقپاراتتىق-كوممۋنيكاتسيالىق تەحنولوگيالار سىندى سالالار 1 210 000 - 1 330 000 تەڭگە ارالىعىن قۇرايدى.
سۇلەيمان دەميرەل اتىنداعى ۋنيۆەرسيتەت
SDU (سۇلەيمەن دەميرەل ۋنيۆەرسيتەتى) – وقۋ ۇدەرىسىن حالىقارالىق ۇلگىدەگى باعدارلاماعا ساي جۇرگىزەتىن وقۋ ورنى. كامپۋستاعى ءبىلىم بەرۋ جۇيەسى 80% - اعىلشىن، 20%-قازاق جانە ورىس تىلدەرىندە جۇرگىزىلەدى.
بۇل ۋنيۆەرسيتەتتە «مەكتەپكە دەيىنگى تاربيلەۋ جانە وقىتۋ» ماماندىعىندا ءبىلىم الۋ ءۇشىن 900 000 تەڭگە قاجەت. جوو-داعى ەڭ قىمبات ماماندىقتار قاتارىنا «ەسەپ جانە اۋديت» پەن «قارجى» ماماندىقتارى كىرەدى. وقۋ قۇنى — 2 160 000 تەڭگە.
ايماقتىق ۋنيۆەرسيتەتتەر
رەسپۋبليكالىق دەڭگەيدەگى ۋنيۆەرسيتتەرمەن سالىستىرعاندا ايماقتىق جوو-لارداعى وقۋ اقىسى الدەقايدا تومەن. ماسەلەن، ش.ءۋاليحانوۆ اتىنداعى كوكشەتاۋ ۋنيۆەرسيتەتىندە پەداگوگيكالىق ماماندىقتاردى اقىلى وقۋ 480 000 – 560 000 تەڭگە ارالىعىن قۇرايدى. ال م.ح. دۋلاتي اتىنداعى تاراز وڭىرلىك ۋنيۆەرسيتەتىندە ءبىلىم الۋ 496 000 تەڭگەدەن باستالىپ، 685 000 تەڭگەگە دەيىن بارادى. سافي وتەباەۆ اتىنداعى اتىراۋ مۇناي جانە گاز ۋنيۆەرسيتەتىندەگى كەز كەلگەن ماماندىقتىڭ 1 جىلدىق وقۋ اقىسى – 651 000 تەڭگە. ال ماگيستر دارەجەسىن الۋ ءۇشىن جىلىنا 780 000 تەڭگە تولەۋ قاجەت.
ايتا كەتەيىك، قازاقستاندا مەملەكەتتىك گرانت كونكۋرسىنا ءوتىنىش قابىلداۋ جالعاسىپ جاتىر. ونىڭ ناتيجەسى 10 تامىزعا دەيىن جاريالاناتىن بولادى.
بيىلعى وقۋ جىلىندا 2 تالاپكەر ۇلتتىق بىرىڭعاي تەستىلەۋدەن 140 بالل جيناپ، سوڭعى ءۇش جىلدا بولماعان رەكوردتى ورناتقان ەدى.
ديانا اcان
«ادىرنا» ۇلتتىق پورتالى
