يۋنەسكو-نىڭ باس ديرەكتورى قازاقستاندىق ءجۋرناليستىڭ ولىمىنە پىكىر ءبىلدىردى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
باس ديرەكتور ودري ازۋلە جۋرناليست ايدوس سادىقوۆتىڭ ولىمىنە سەبەپكەرلەردى ايىپتادى.
«جۋرناليست ايدوس سادىقوۆتىڭ ءولىمىن ايىپتايمىن جانە كىنالىلەردى جاۋاپكەرشىلىككە تارتۋ ءۇشىن جان-جاقتى تەرگەۋ جۇرگىزۋگە شاقىرامىن. جۋرناليستەر قاي جەردە جۇمىس ىستەسە دە، ولاردىڭ كاسىبي مىندەتتەرىن اتقارۋى ءۇشىن ولاردىڭ قاۋىپسىزدىگىنە كەپىلدىك بەرىلۋى كەرەك»، - دەدى يۋنەسكو باس ديرەكتورى ودري ازۋلە.
ايتا كەتەيىك، سادىقوۆ 18 ماۋسىم كۇنى كيەۆتەگى ءۇيىنىڭ جانىندا ءولتىرىلدى.
19 ماۋسىمدا پرەزيدەنت قاسىم-جومارت توقاەۆ سادىقوۆقا جاسالعان قاستاندىققا قاتىستى پىكىر ءبىلدىرىپ، ديپلوماتيالىق دەپارتامەنت پەن قۇقىق قورعاۋ ورگاندارى ارقىلى وسى اۋىر وقيعانى ءجىتى باقىلاۋعا الۋدى تاپسىرعان. پرەزيدەنت قاجەت بولعان جاعدايدا قازاقستاننىڭ رەسمي ورگاندارىنا دا قىلمىستىق ىسكە قاتىستى نازار اۋدارۋعا شاقىردى.
