رەسەيلىك اناستاسيا كۋچەروۆا 2026 جىلعى وليمپيادا ويىندارىنىڭ اشىلۋ سالتاناتىندا ۋكراينا قۇراماسىنىڭ تاقتايشاسىن كوتەرىپ شىقتى. بۇل تۋرالى Associated Press اگەنتتىگى جازدى، دەپ حابارلايدى «ادىرنا» ءتىلشىسى.
بويجەتكەن بۇنداي قادامعا كەزدەيسوق بارماعانىن ايتتى.
«بۇل ادامداردىڭ قاسىندا تۇرعان كەزدە ولاردىڭ كەز كەلگەن رەسەيلىكتى جەك كورۋگە تولىق قۇقىعى بارىن تۇسىنەسىڭ. دەگەنمەن، مەنىڭ ويىمشا، ولارعا ءبارى بىردەي ويلامايدى دەپ كورسەتۋ ءۇشىن كىشكەنە بولسا دا قادام جاساۋ ماڭىزدى»، — دەدى ول.
AP اگەنتتىگىنىڭ مالىمەتىنشە، اناستاسيا 2018 جىلدان بەرى رەسەيگە بارماعان جانە 14 جىلدان بەرى ميلاندا تۇرادى. ارۋ ارحيتەكتور بولىپ جۇمىس ىستەيدى. ۋكراينا قۇراماسىنىڭ تاقتايشاسىن كوتەرۋ مىندەتىن ول ادەيى سۇراپ العان.
رەسەيلىك قىز ۋكراينا سپورتشىلارىنىڭ الدىندا تاقتايشا كوتەرۋ ءوزىنىڭ «شاعىن قارسىلىق ارەكەتى» بولعانىن، ونى رەسەيدە قاماۋدا بولعان ديسسيدەنت الەكسەي ناۆالنىيدىڭ ۋلانۋدان قايتىس بولعانىنا ەكىنشى جىل تولۋىنا ارناعانىن مالىمدەدى.
ايتا كەتەيىك، وليمپيادانىڭ اشىلۋ ءراسىمى 6 اقپاندا وتكەن ەدى، ال 2026 جىلعى ويىندار 22 اقپانعا دەيىن جالعاسادى.
