قوشتاسپايتىندارعا ساباق. موڭعوليا پرەزيدەنتى ءراسىم وتكىزىپ دوعارىسقا كەتتى

300
Adyrna.kz Telegram
https://adyrna.kz/storage/uploads/tQzAge863C0FAYwUX5UgDDDYGw32AO08jL5tlzch.jpg

فوتو: مontsame اگەنتتىگى

بۇگىن، 20 قاراشا كۇنى ۇلان-باتوردا ءسۇحبااتار الاڭىندا موڭعوليانىڭ التىنشى پرەزيدەنتى بولعان 58 جاستاعى ۋحنااگين حۇرەلسۇحپەن قوشتاسۋ ءراسىمى ءوتتى. بۇل تۋرالى Montsame اگەنتتىگى جازدى، دەپ حابارلايدى “ادىرنا”.

ءراسىمنىڭ باسىندا پرەزيدەنتتىك وكىلەتتىگىن مەرزىمىنەن بۇرىن توقتاتقان ۋ.حۇرەلسۇح ۇلى شىڭعىس حان ەسكەرتكىشىنە تاعزىم ەتتى. ودان كەيىن ارنايى ورناتىلعان مىنبەرگە كوتەرىلىپ، قۇرمەت قاراۋىلى روتاسىنىڭ الدىندا ورىن الدى. وسى كەزدە روتا كومانديرى، كاپيتان ب.ەنحمانلاي جەكە قۇرامنىڭ سالتاناتتى راسىمگە دايىن ەكەنىن باياندادى.

مەملەكەتتىك ءانۇران ورىندالعاننان كەيىن ۋ.حۇرەلسۇح قۇرمەت قاراۋىلىنىڭ جەكە قۇرامىمەن سالەمدەستى. سونداي-اق راسىمگە قاتىسقان ديپلوماتيالىق ميسسيالاردىڭ باسشىلارىمەن، جوعارى لاۋازىمدى مەملەكەتتىك قىزمەتكەرلەرمەن، كۇشتىك قۇرىلىمدار مەن قۇقىق قورعاۋ ورگاندارىنىڭ باسشىلارىمەن جانە قوعام وكىلدەرىمەن قول الىسىپ امانداستى.

سالتاناتتى ءراسىم كورنەكتى موڭعول كومپوزيتورلارىنىڭ شىعارمالارىن ورىنداعان ۇلگىلى اسكەري ۇرمەلى اسپاپتار وركەسترىنىڭ ونەر كورسەتۋىمەن اياقتالدى. بۇدان سوڭ ۋ.حۇرەلسۇح ورتالىق الاڭنان كەتتى.

ءىس-شاراعا مەملەكەتتىك ورگاندار مەن ۇكىمەت وكىلدەرى، سونىڭ ىشىندە پارلامەنت - مەملەكەتتىك ۇلى حۋرالدىڭ توراعاسى سانداگين بيامباتسوگت پەن پرەمەر-مينيستر نيام-وسورىن ۋچرال قاتىستى.

بۇدان الدىن موڭعوليا پرەزيدەنتى ۋحنااگين حۇرەلسۇح ءوز بەدەلىن قالپىنا كەلتىرۋ ماقساتىندا پرەزيدەنتتىك وكىلەتتىگىنەن باس تارتۋعا نيەتتى ەكەنىن مالىمدەگەن.  وعان دەيىن موڭعوليا دەموكراتيالىق پارتياسىنىڭ پارلامەنتتىك فراكتسياسى ونى وتستاۆكاعا كەتۋگە شاقىرىپ، ءىستىڭ اق-قاراسىن انىقتاۋدى تالاپ ەتكەن. «مەن بۇل تالاپتى قولدايمىن. موڭعوليا پرەزيدەنتى رەتىندەگى وكىلەتتىگىمدى تاپسىرامىن. ماعان قاتىستى تەرگەۋ جۇرگىزىلىپ، ابىرويىم قالپىنا كەلتىرىلەدى»، - دەگەن. ايىپتاۋلار تاۆان-تولگوي – گاشۋنسۋحايت تەمىرجولىن سالۋعا ارنالعان قۇپيا تەندەرمەن بايلانىستى. اتالعان تەندەردىڭ جەڭىمپازى Bodi Group كومپانياسى بولعان. بولجام بويىنشا، كەيبىر ساياساتكەرلەر جالپى سوماسى 110 ميلليون دوللار بولاتىن پارا الۋى مۇمكىن. وعان ەلدىڭ بىرنەشە پرەزيدەنتىنىڭ  قاتىسى بولۋى مۇمكىن ەكەنى ايتىلادى. 

19 قاراشادا ۇلى حۋرال پرەزيدەنتتىڭ دوعارىسقا كەتۋىن قۋاتتاعان سوڭ ەل باسشىسى قىزمەتىن پارلامەنت توراعاسى سانداگين بيامباتسوگت ۋاقىتشا اتقاراتىن بولدى. 

ۋحنااگين حۇرەلسۇح 2021 جىلدىڭ 25 ماۋسىمىنان بەرى موڭعوليا پرەزيدەنتى قىزمەتىن اتقارىپ كەلگەن. ول 2017–2021 جىلدارى ەل ۇكىمەتىن باسقارعان. ونىڭ ءالى اياقتالماعان بىرنەشە اي وكىلەتتىگى قالعان ەدى. موڭعوليادا پرەزيدەنت 6 جىلعا ءبىر مەرزىمگە عانا سايلانا الادى. حۇرەلسۇح دوعارىسىن جاريالاعان سوڭ، ەل بيلىگىندە بىرنەشە لاۋازىم يەسى دە وتستاۆكاعا كەتتى.

موڭعوليادا پرەزيدەنتتىڭ مەرزىمىنەن بۇرىن ءوز ەركىمەن قىزمەتتەن كەتۋى بۇرىن-سوڭدى بولماعان. 

پىكىرلەر