20 ماۋسىم كۇنى بىشكەك قالاسىندا جىبەك جولى مەملەكەتتەرىنىڭ ونەرلى ايەلدەر قاۋىمىن جيناعان القالى جيىن ءوتتى. حالىقارالىق فورۋمدا قىتاي، قىرعىزستان، ءازىربايجان، وزبەكستان جانە قازاقستاننان كەلگەن وكىلدەر باس قوستى. سۋرەتشىلەردىڭ، ديزاينەرلەردىڭ جانە قولونەرشى قىز-كەلىنشەكتەردى ءبىر شاڭىراق استىنا توپتاستىرعان ءىس-شارا بىشكەك ۇلتتىق تاريح مۇراجايىندا ءوتتى.
فورۋمدى قىتايدىڭ شەنسي ايەلدەر فەدەراتسياسى مەن جىبەك جولى ەلدەرىنىڭ ديزاينەرلەر وداعى، قىرعىز رەسپۋبليكاسىنىڭ ءبىلىم جانە عىلىم مينيسترلىگى، ۇلتتىق تاريح مۇراجايى جانە «قۇراق ايەلدەر فورۋمى» قوعامدىق ۇيىمى بىرلىكتە ۇيىمداستىردى.
اتالعان فورۋمعا قازاقستان اتىنان قر سۋرەتشىلەر وداعىنىڭ مۇشەسى، قازاقستاننىڭ ەڭبەك سىڭىرگەن ونەر قايراتكەرى ساۋلە سىزدىققىزى باپانوۆا قاتىسىپ، جولداسى ءالىباي باپانوۆ ەكەۋىنىڭ تۋىندىلارىن كورمەگە قويدى. ءاربىر كورمەدە بىرەگەي ۇلتتىق ناقىشتار مەن ونەردىڭ زاماناۋي ينتەرپرەتاتسيالارى كورسەتىلدى. سونىمەن قاتار، ۇلى جىبەك جولى ەلدەرى ديزاينەرلەر وداعىنىڭ ءسان كورسەتىلىمى ۇيىمداستىرىلدى. وندا مادەني داستۇرلەر مەن زاماناۋي ترەندتەردەن شابىتتانعان توپتامالار كورسەتىلدى.
«فورۋمعا قازاقستان اتىنان مەنى شاقىرعان ەكەن. ەكى-ءۇش اي بويى كەلىسسوز جۇرگىزىپ، تۋعان ەلدىڭ اتىنان ءبىزدى تاڭداعانىن جەتكىزدى. بۇل ارينە، مەن ءۇشىن بيىك مارتەبە ءارى زور جاۋاپكەرشىلىك بولدى. ءىس-شاراعا ونەرى ارقىلى ۇلتتىق مادەنيەتتى دامىتىپ جۇرگەن بەس ەلدىڭ مىقتى ايەلدەرى جينالدى. وتە ىسكەر، ونەرلى، جالىنداعان وكىلدەر باس قوستى دەي الامىن. ۇيىمنىڭ الداعى ماقساتتارى كەرەمەت. يدەيا اۆتورى، بۇۇ شىعارماشىلىق رەزەرۆىنىڭ مۇشەسى، جىبەك بويىنشا سۋرەتشى فان يانيانمەن جاقىن سويلەسىپ، سۇحبات قۇردىق. مەنىڭ اپارعان جۇمىستارىم قىتاي دەلەگاتسياسىنا وتە ۇناپ، جوعارى باعاسىن بەردى. وسى جىلدىڭ قازان ايىندا سياندا وتەتىن كورمەگە قۇرمەتتەپ شاقىردى. زامانعا ساي ۇلتتىق ونەرىمىزدى الەم ەلدەرى الدىندا ابىرويمەن دارىپتەپ كەلگەنىمە قۋانىشتىمىن»، دەدى قازاقستان سۋرەتشىسى ساۋلە باپانوۆا.
بىشكەكتە وتكەن ءىس-شارا جىبەك جولى ەلدەرى اراسىنداعى مادەني الماسۋ مەن ىنتىماقتاستىقتى نىعايتۋدىڭ تاماشا الاڭىنا اينالدى. جينالعان كوپشىلىك جىبەك جولى ەلدەرىنىڭ ءوزارا ونەر ىنتىماقتاستىعىنىڭ باستاماسى بولاتىن مەموراندۋمعا قول قويىلعانىنا كۋا بولدى. بىشكەك ۋنيۆەرسيتەتىنىڭ جانىنان جىبەك جولى ەلدەرىنىڭ ونەرىنە ارنالعان زەرتحانا اشىلدى. سونىمەن قاتار جىبەك جولى ديزاينەرلەر وداعىن قۇرىپ، ونىڭ پرەزيدەنتى بولىپ قىرعىز ەلىنىڭ وكىلى ديلبار اشيمباەۆا سايلاندى. راسىندا دا، مادەنيەت جۇرەكتەردى جاقىنداستىرادى، ال ونەر الەمدى بىرىكتىرەدى. ۇلتتىق ونەر بىرەگەيلىكتى ايشىقتاپ، وركەنيەتتەر ديالوگىنا سەبەپكەر بولاتىن زور الەۋەتكە يە ەكەنىن وسى فورۋم تاعى ءبىر رەت دالەلدەي الدى.
