فوتو: ria.ru
اۋعانستانداعى تاليبان بيلىگى ەلدەگى ۋنيۆەرسيتەتتەردە ايەلدەر جازعان كىتاپتاردى وقىتۋعا تىيىم سالدى. سونىمەن قاتار ادام قۇقىقتارى مەن جىنىستىق بوپسالاۋ تاقىرىپتارى دا وقۋ باعدارلاماسىنان الىنىپ تاستالدى. بۇل تۋرالى ۆۆس جازدى، دەپ حابارلايدى "ادىرنا".
تالىپتەر 680-گە جۋىق كىتاپتى وقۋ باعدارلاماسىنان الىپ تاستادى. ونىڭ ىشىندە 140 وقۋلىق ايەلدەرگە تيەسىلى. ولار «شاريعات پەن جۇيە ساياساتىنا قايشى» دەپ تانىلدى.
بۇعان قوسا، 18 ءپاندى وقىتۋعا تىيىم سالىندى. ونىڭ التاۋى تىكەلەي ايەلدەر تاقىرىبىنا بايلانىستى – “گەندەر جانە دامۋ”، “ايەلدەردىڭ كوممۋنيكاتسياداعى ءرولى”، “ايەلدەر سوتسيولوگياسى” جانە تاعى باسقالارى.
بۇل شەشىم – سوڭعى ءتورت جىل ىشىندە بيلىككە قايتا كەلگەننەن كەيىن ەنگىزىلگەن شەكتەۋلەردىڭ جالعاسى. جاقىندا عانا ەلدىڭ كەمىندە 10 پروۆينتسياسىندا تالشىقتى-وپتيكالىق ينتەرنەتكە تىيىم سالىندى.
ايەلدەرگە قاتىستى ەڭ اۋىر سوققى ءبىلىم بەرۋ سالاسىندا بايقالىپ وتىر. قىزدارعا التىنشى سىنىپتان كەيىن وقۋعا رۇقسات جوق. 2024 جىلدىڭ سوڭىندا سوڭعى مۇمكىندىك سانالاتىن اكۋشەرلىك كۋرستار دا جابىلعان ەدى.
بۇرىنعى ادىلەت ۆيتسە-ءمينيسترى ءارى تىيىم سالىنعان كىتاپ اۆتورلارىنىڭ ءبىرى زاكيا ادەلي بۇل شەشىمگە تاڭعالماعانىن ايتتى.
سوڭعى ءتورت جىلداعى تاليبانداردىڭ ساياساتى ەسكەرىلسە، وقۋ باعدارلاماسىنا مۇنداي وزگەرىستەر ەنگىزۋ – كۇتپەگەن جاعداي ەمەس. ايەلدەرگە وقۋعا تىيىم سالىنعان جەردە ولاردىڭ ويلارى مەن ەڭبەكتەرىنە دە ورىن جوق، – دەدى ول.
بۇعان قوسا، يران اۆتورلارى نەمەسە يراندا باسىلعان كىتاپتارعا دا تىيىم سالىندى. تىيىم سالىنعان 679 كىتاپتىڭ 310-ى – يراندىق اۆتورلاردىكى نەمەسە يراندا شىققان ەڭبەكتەر. ساراپشىلاردىڭ ايتۋىنشا، بۇل شەشىم اۋعان ۋنيۆەرسيتەتتەرىن الەمدىك عىلىمي قاۋىمداستىقتان وقشاۋلاپ، جوعارى بىلىمدە ۇلكەن بوس كەڭىستىك قالدىرادى.
يران اۆتورلارى مەن اۋدارماشىلارىنىڭ ەڭبەكتەرى ءبىزدىڭ ۋنيۆەرسيتەتتەردى الەمدىك اكادەميالىق ورتاعا جالعاپ تۇرعان نەگىزگى كوپىر ەدى. ولاردى الىپ تاستاۋ – ءبىلىم سالاسىندا وراسان ولقىلىق تۋعىزادى، - دەپ جاعدايدى سيپاتتادى كابۋل ۋنيۆەرسيتەتىنىڭ پروفەسسورى.
جاڭا ەرەجەلەر تامىز ايىنىڭ سوڭىندا كۇشىنە ەنگەن. تاليبان بيلىگى ازىرگە بۇل شەشىم بويىنشا رەسمي پىكىر بىلدىرمەدى.
