«اتامۇرا» كورپوراتسياسىنىڭ پرەزيدەنتى، باسپاگەر قۇل-مۇحاممەب راقىمعالي الەۋمەتتىك جەلىدەگى پاراقشاسىنا قوعام قايراتكەرى، عالىم مۇرات اۋەزوۆتى ەسكە الىپ جازبا جاريالادى، دەپ حابارلايدى “ادىرنا” ۇلتتىق پورتالى.
ەستەلىككە تولى جازبانىڭ تولىق نۇسقاسىن ۇسىنامىز.
ارداقتى اعايىن، بۇگىن تۇلپاردىڭ تۇياعى، جاقسىنىڭ ءوزى - مۇرات مۇحتارۇلى اۋەزوۆتى سوڭعى ساپارعا شىعارىپ سالدىق. مۇرات اعا 80 جاسقا تولعاندا “اتامۇرا “ باسپاسىنان “قازاق رۋحى”، ”ورتەڭدە ونگەن گۇل” جانە “مۇرات” اتتى كىتاپتارىن جارىققا شىعارىپ، باتاسىن العان ەدىم. مۇرات اعانىڭ اناسىنا ارنالعان “ورتەڭدە ونگەن گۇل” كىتابىنىڭ العى ءسوزىن مۇحتار اعامىز جازىپ،تۇساۋكەسەر ءراسىمىن ۇلتتىق كىتاپحانادا وتكىزگەن ەدىك.
تۇساۋكەسەرگە مۇرات اعا، تورەگەلدى اعا، ولجاس اعامىز، قازاقستان جازۋشىلار وداعىنىڭ توراعاسى مەرەكە قۇلكەنوۆ اعالارىمىز باستاعان زيالى قاۋىم وكىلدەرى،سونداي-اق سۇلەەۆ، جانسۇگىروۆتەر اۋلەتىنىڭ ۇرپاقتارى قاتىسىپ، جوعارى دەڭگەيدە ءوتىپ ەدى. اسىرەسە، مۇرات اعا سول كۇندەرى دوستارىن، تۋىستارىن كورىپ ءبىر جاساپ قالعان ەدى.
ال “قازاق رۋحى” كىتابىنىڭ تۇساۋكەسەرىن مۇرات اعانىڭ ۇسىنىسىمەن اباي وبلىسىنىڭ ورتالىعى سەمەي قالاسىنداعى مۇحتار اۋەزوۆ اتىنداعى پەد.كوللەدجدە وتكىزدىك. بۇل كىتاپتىڭ دا العى ءسوزىن مۇحتار اعامىز جازدى.
سول كەزدەردە مۇرات اعا مەنى وزىنە ارنايى شاقىرىپ، “راقىمعالي باۋىرىم، بىلتىر ەلدە بولىپ قايتتىم، سوڭعى كەزدە دەنساۋلىعىم سىر بەرىپ ءجۇر، قازىر ەل جاققا بارا المايتىن سياقتىمىن. مىنا كىتاپتىڭ تۇساۋكەسەرىن سەمەي قالاسىندا وتكىزسەڭدەر وتە دۇرىس بولار ەدى، وزدەرىڭ بارىپ قايتارسىڭدار” دەپ زيفا-الۋا اپايىمىز باستاعان ءبىر توپ ادامنىڭ ءتىزىمىن كورسەتتى، ىشىنە مەنى دە قوسىپتى.
“مەنىڭ مىنا سالەمىمدى ەلدىڭ الدىندا ءوزىڭنىڭ وقۋىڭدى سۇرايمىن”- دەپ، سوڭىنا قولىن قويعان ءۇش بەت قاعازدى ماعان ۇسىندى.
ءبىز اعانىڭ اماناتىن بۇلجىتپاي ورىندادىق. اباي وبلىسىنىڭ باسشىلىعى مەن يگى جاقسىلارى ءبىزدى وتە جاقسى قارسى الدى.
تاعى ءبىر كۇنى مۇرات اعا حابارلاسىپ نەمەرەسى الاننىڭ تۋعان كۇنىنە شەتەلگە بارا جاتقانىن ايتىپ، قانداي سىيلىق جاساۋعا بولادى دەپ سۇرادى. مەن بىردەن دومبىرا سىيلاۋدى ۇسىندىم جانە كىشكەنتاي بالالارعا ارنالعان ارنايى فۋتليارىمەن دومبىرالار بار ەكەنىن، ونى ءوزىم اكەپ بەرەتىنىمدى ايتتىم.
وسىلايشا جولاۋشى اعامىزدىڭ ارنايى بالالارعا لايىقتاپ جاساعان دومبىراسىن قورابىمەن اعامىزدىڭ قولىنا تابىستادىم. اعامىز دومبىرانى ۇستاپ تۇرىپ، “ال ەندى، راقىمعالي باۋىرىم، وسىنى العاشقى بوپ ءوزىڭ تارتىپ، ءبىر اۋىز ء“اۋ” دەسەڭشى دەمەسى بار ما. سول- اق ەكەن، اعامىزدىڭ كومەكشىسى ەرنات تەلەفوننىڭ كامەراسىن ماعان بۇرىپ تۇسىرگەلى جاتقانىن بايقادىم دا، دەرەۋ دومبىرانى قولىما الىپ، سۋىرىپ سالىپ ەكى-ءۇش شۋماق قۇراپ جىبەردىم. اعامىز قول شاپالاقتاپ، بالاشا قۋانىپ ەدى.
ارتىنان اعامىزبەن قوڭىر ءتۇس ءتۇرالى، دومبىرا تۋرالى ۇزاق اڭگىمەلەستىك.
كەشە كەشكە الماتى قالاسىنىڭ اكىمشىلىگى ۇيىمداستىرعان “جالىن” مەيرامحاناسىندا اعامىزدىڭ قوناق اسى بەرىلىپ، بۇگىن مۇحتار اۋەزوۆ اتىنداعى تەاتردا ،قاسيەتتى قۇربان ايت كۇنى قوشتاسىپ، اقتىق ساپارىنا شىعارىپ سالدىق. مۇرات مۇحتارۇلىنا اكەسى ۇلى جازۋشى مۇحتار ومارحانۇلىنىڭ قاسىنان جەر بۇيىرىپتى. جانىڭىز ءجانناتتا بولسىن، ارداقتى اعا.
سوڭعى كەزدە ەلىمىزدىڭ يگى جاقسىلارى، زيالىلارى ازايىپ بارا جاتقانداي كورىنەدى…
كەشە عانا اكادەميك تورەگەلدى شارمانۇلى ومىردەن وتسە، بۇگىن مۇرات مۇحتارۇلىمەن قوشتاستىق.
ۇلتىمىزدىڭ ماقتانىشىنا اينالعان ات توبەلىندەي ارداقتى اعالارىمىز امان بولسا ەكەن!
قۇل-مۇحاممەد راقىمعالي
«اتامۇرا» كورپوراتسياسىنىڭ پرەزيدەنتى
