الماتىدا مۇحتار اۋەزوۆ اتىنداعى قازاق ۇلتتىق دراما تەاترىندا مەملەكەت جانە قوعام قايراتكەرى مۇرات مۇحتارۇلى اۋەزوۆپەن قوشتاسۋ ءراسىمى ءوتتى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
قازاقستاندىق قوعام قايراتكەرى، مادەنيەتتانۋشى مۇرات اۋەزوۆتىڭ قوشتاسۋ راسىمىنە مينيسترلىك پەن اكىمدىك وكىلدەرى، سەنات دەپۋتاتتارى، قوعام قايراتكەرلەرى مەن قازاق زيالىلارى، مارقۇمنىڭ تۋعان-تۋىستارى قاتىستى. ءىس-شارا بارىسىندا مەملەكەت باسشىسىنىڭ كوڭىل ايتۋ حاتىن پرەزيدەنت كەڭەسشىسى مالىك وتارباەۆ وقىدى.
"اسا كورنەكتى مەملەكەت جانە قوعام قايراتكەرى، مادەنيەتتانۋشى، شىعىستانۋشى عالىم، ءبىرىنشى دارەجەلى بارىس وردەنىنىڭ يەگەرى، ديپلومات مۇرات مۇحتارۇلى اۋەزوۆتىڭ دۇنيەدەن وتۋىنە بايلانىستى قايعىلارىڭىزعا ورتاقتاسىپ، كوڭىل ايتامىن. مۇرات مۇحتارۇلى ۇلت رۋحانياتىنىڭ العا باسۋىنا، قازاق عىلىمىنىڭ كوكجيەگىن كەڭەيتۋگە بار سانالى عۇمىرىن ارناعان زيالى، پاراساتتى تۇلعا ەدى. قازاق ادەبيەتى مەن مادەنيەتىن، تاريحىن تەرەڭ زەردەلەپ، سوندا ولشەۋسىز مۇرا قالدىردى. قازاقستاننىڭ حالىقارالىق دارەجەدەگى بەدەلىنىڭ ارتۋىنا ءوزىنىڭ ساياسي قوعامدىق ىستەرىمەن زور ۇلەس قوستى", - دەلىنگەن مەملەكەت باسشىسىنىڭ كوڭىل ايتۋ حاتىندا.
قوشتاسۋ راسىمىندە مەملەكەت جانە قوعام قايراتكەرى مۇحتار قۇل-مۇحامەد ءمۇرات اۋەزوۆ پەن اكەسى مۇحتار اۋەزوۆتىڭ اراسىنداعى ەرەكشە بايلانىسقا توقتالدى.
"اسىلدىڭ سىنىعى دەسەك تە، تۇلپاردىڭ تۇياعى دەسەك تە جاراساتىن اسىل اداممەن قوشتاسۋعا كەلىپ وتىرمىز. مۇحتار اۋەزوۆتىڭ 4 ۇلى بولعان. ءبىرىنشىسى، شوقان دەگەن بالاسى 1 جاسىندا شەتىنەپ كەتكەن. ودان كەيىن لەنينگرادتا وقىپ جۇرگەن كەزدە ۆالەنتينا جەڭگەمىزدەن تۋعان ەلدەس دەگەن بالا دا 1 جاسىندا قايتىس بولعان. ودان كەيىن ەلدار دەگەن بالاسى 3 جاسىندا شەتىنەپ كەتەدى. ۇلدان تۇقىمسىز قالام با دەپ جۇرگەندە فاتيما جەڭگەمىزبەن كوڭىل قوسىپ، دۇنيەگە مۇرات كەلەدى. مۇراتتى اناسىنىڭ قۇرساعىنا بىتكەن كۇننەن باستاپ ايالاعان ادام - مۇحتار اۋەزوۆ. «التىن بالام» دەپ حات تانىماعان بالاسىنا تالاي حات جازعان. مىنە سول التىن بالا اكەسىنىڭ سەنىمىن اقتادى", - دەدى مۇحتار قۇل-مۇحامەد.
ايتا كەتەيىك، 14 ماۋسىم كۇنى مادەنيەتتانۋشى، عالىم، ديپلومات، مەملەكەت جانە قوعام قايراتكەرى، مۇحتار اۋەزوۆتىڭ ۇلى مۇرات اۋەزوۆ ومىردەن وتكەنىن حابارلاعان بولاتىنبىز.
